Local council-te'n khawmpui an hmang LC-te thuneihna mumal zawka siam duh

Aizawl City Local Council Association (ACLCA) chuan, nimin khan Vanapa Hall-ah general assembly an hmang a, AMC mayor PC Lalhmingthanga'n a hman pui. ACLCA chuan local council-te thuneihna mumal zawka siam an duh.

Conference hi ACLCA presideny R Lalchhuanawma'n kaihruaiin, PC Lal-hmingthanga chuan mi ṭhahnemngaiten AMC hnathawh an sawisel ṭhin chu lawmawm a tih thu sawiin, "AMC sum hmanga hnathawh tur reng reng chu a hmunah kala endik hmasak phawt ṭhin a ni tawh dawn. Chumi hnuah chauh hnathawh tum a ni tawh a, endik lo chu hnathawh phal a ni tawh dawn lo," a ti.

AMC Mayor chuan AMC councillor leh local council-te chu mipui thlan an nih avangin mipuite tana thawk tur an ni tih sawiin, "AMC ward tinah hnathawhna atan cheng nuai 10 theuh dah a ni dawn," a ti a, ṭha taka hnathawh anih theihna atan vilpui turin local council-te chu a sawm a ni.

Mi ṭhenkhat mahni tana thawk an ni tih hre lo niawm taka rinawm lo taka hnathawk an awm ṭhin tih sawiin PC Lalhmingthanga chuan, "Mipuiten an sawisel chung pawha siamṭhat tum miah lo an awm hi a ṭha lo. Fawng vuantu nih vanga mahni chhungte leh mahni tan tia dik lo taka thuneihna hman chu a hnuah a langchhuah leh ṭhin tho a ni," a ti.

Khawmpuiah hian an member nunna chante sunna hun hman a nih bakah, chawhnu lamah ro an rel a ni.

ACLCA khawmpuia thu pass-te

1. Vawk leh ar vulh chungchangah chak zawka hmalak a nih theihna atan dan felfai tak siam turin AMC-ah thlen ni rawh se.

2. Sorkar department-ten local council-te hnathawh dan tur an rawn ruahman, sum leh pai senso ngai chiah chuan AMC hriatpuinain hma lak ni rawh se.

3. Sorkar department-te'n local council member-te an koh khawm ṭhinah hian TA/DA tihpun ni rawh se.

4. Local council member, secretary leh tlangaute lawmman tihpun ni rawh se.

5. Emergency works atan local council-te hi AMC aṭangin fund pek ve ni rawh se.

6. Chhiatrup thilah local council-te'n rang taka hma an lak theihna atan local council tinte silpauline 10 kawl tura hma lak ni rawh se.

7. Street light maintenance atan AMC
aṭangin local council-te sum tam zawk pek ni rawh se.

8. Street light chhia siam zung zung a nih theihna atan AMC-in chak zawkin hma la rawh se.

9. Local council-te thuneihna mumal zawka siam a nih theihna atan AMC-ah thlen ni rawh se.