MGNREGA hnuaia hnathawhte sawiho

State Employment Guarantee Council (SEGC) chu parliamentary secretary (RD) Lt Col. ZS Zuala hoin Secretariat conference hall-ah an ṭhukhawm a, MNREGA hnuaia hnathawhte leh hnathawh leh tur hrang hrangte an sawiho.

Lt. Col. ZS Zuala chuan MNREGA hnuaia mipui leh khawtlang tana ṭha tur hnathawh hrang hrangte sawifiahin, "MNREGA hnuaia mipui inhlawhna tur atana sum lokal, hun tep ter leh hmanhmawh thlakah Planning leh Finance dept. hotute'n chak takin min lo bawhzui pui ṭhin a, a lawmawm hle," a ti a, hnathawhna tur sumte hi hmanhmawh ngai chi a nih ṭhin avanga hun dangah pawh ngaihpawimawh sak thin turin Planning leh Finance dept. hotute a ngen.

RD secretary Lalhmingthanga tarlan danin, PWD Schedule of Rate (SOR ) chu MGNREGA hnathawh ṭhenkhatah a rate a inang loin hman tawm a remchang thei loa, chuvang chuan terrace leh dil huan siamna atan bik SOR siam a ni.. MGNREGA a thawktu staff te hlawh tur cheng nuai 1056.46 pawh chinfel a ni tawh.

Meeting-ah hian MGNREGA hnuaia hnathawh hrang hrangte sawikhawmin district hrang hrang ami ten an hnathawh dan report an pe a, job card chungchanga bank nena indawrna a harsatna awm ṭhin sutkian dan tur sawiho a ni.

Meeting-ah hian RD dept. hotute bakah MNREGA hnuaia Line dept. hrang hrang PWD, PHE, ICDS, Forest, Agriculture, Sericulture, Soil & Water Conservation, Fisheries leh Horticulture hotute an tel.