Committee on Afforestation and Conservation thukhawm

NLUP Implementing Board (NIB) chairman leh Champhai South bialtu MLA JH Roṭhuama hoin, nimin khan Champhai Circuit House-ah District Level Committee on Afforestation and Conservation an ṭhukhawm. Hei hi NIB leh Mizoram Environment and Forest Consultative Forum (MEFCOF) ten thing leh mau leh nungcha humhalh tura thawkho tura an rel bawhzuina a ni.

JH Roṭhuama chuan, "Ram-ngaw leh nungchate humhalh a, Mizo thei rah kan neih te tipung a, tuikhur leh tuihna humhalh a tih pun chu ram hmasawnna kal zel turah pawimawh tak a tling a ni. Kan ramngaw leh nungchate hi kan ram ti mawi leh ti nuamtu tur, khualzin te hip theitu tur an ni. Tlai tawh deuh mah se, tun chinah chuan kan ram rohlute humhalh tur hian kan harh thar a, kan ṭan tlan a ngai a ni," a ti.

Champhai DC Vanlalngaihsaka pawhin thu sawiin, "Champhai district-ah tui hna a kang chak hle niin mithiamten an sawi. Inrenchem taka hmang leh tuinhna tipung tura hmalak anih loh chuan kan tu leh fa te tan tui tlan tur a awm tawh mang lo ang tih a hlauhawm," a ti a, ramngaw leh nungcha humhalh kawngah ṭangrual taka hmalak a pawimawh thu a sawi.

Thusawitu dang, MEFCOF president VL Bela chuan sorkar leh NGO-ten lungrual tak chungin thawhhona ṭha tak nena hmalak chuan awmze nei takin hmasawnna ṭha tak a hmuh thei dawn tih sawiin, "Ramsate hian mi an nel hma a, anmahni humhalhtu emaw tichereu theitu mihringah chu chu a innghat a ni," a ti.

Committee hian district chhunga afforestation kalpuina hmun 'Zotheihuan' hmalakna neih theihna hmun tur thlithlaiin, helai hmun hi mipuiin an tihchereu loh nan leh an khawih danglam loh nana inhrilhhre tura hmalak dan ruahmante a ngaihtuah ang.