MNF-in sorkar leh HPC (D) inbiak phût

MNF sr. vice president Tawnluia chuan, Mizoram sorkar leh HPC (D) te chu dawhkan khat kila inbiakremna kawng zawh tura an phut ve ve thu a sawi.

Home minister hlui Tawnluia hian nimin khan Mizo Hnam Runah thu sawiin, HPC (D) lamin inbiak an duh pawhin Mizoram sorkarin thudelhkilh a neih tlat avangin inbiakna a awm thei lo tih a sawi a, "Hei hi remhriat loh thlak kan ti. Inbiakna a awm hmasa anga inremna kawng a inhawng zawk tur a ni," a ti.

Tawnluia chuan, "Khaw 31-a village council inthlang thei loa a awm reng hnuah inthlanna buatsaih a ni tur hi lawmawm kan tih rualin, inthlanna thianghlim leh felfai a awm theihna atan a tawp thlengin Mizoram sorkar hian law & order kengkawh ṭha rawh se," a ti a, Mizoram Hmar lamah hel pawl silai keng an awm a ni tih hre reng chunga V/C inthlan tur venghim zo loah sorkar a puh.

HPC (D) demand area chu Mizoram sorkarin rambuai (disturbed area)-ah puan a lo tum tawh tih sawiin MNF Sr. Vice President chuan, "MNF chuan hei hi kan phal awzâwng lo a, sum siamna atan Mizoram hmar lam area hman hi kan phal hauh lo. kan duh loh thu pawh nasa taka kan au chhuahpui hnuah Sorkar chuan a kaltlangpui ngam ta lo a ni," a ti.

Tawnluia sawi danin, MNF sorkar laiin hel pawl hrang hrang - MAIDA, HRF, BNLF, BLFM, ZSF etc.-te chu nunphung pangngai zawh leh turin an helna rilru an hmet mitin, khua leh tui pangngaiah an seng lut a ni.

Zohnahthlakte inzawmkhawm chungchang sawiiin Tawnluia chuan, "MNF hian Zofate ram hrang hrang, tlang hrang hranga kan awm leh ṭhendarha kan awm hi ṭha kan ti loa insuihkhawm leh tura tlangau hmasa ber pawh kan ni. Laldenga hoa MNF din a nih khan Zofate rorelna pakhat hnuaia kan awm theihna atan hmalak kha kan thil tum bulpui, tun thleng pawha MNF party Constitution-a la chuang leh kan hmalakna kal mek a ni, a ti.