COVID-19: Mizoram dinhmun Hripui vei 17 hmuh belh a ni

December 9, Nilaini khan Mizoramah Covid-19 vei mi 17 hmuh chhuah a ni a, nimin khan hripui laka fihlim tawh mi 16 chhuahtir an ni thung.

Covid-19 vei hmuh chhuah tharte chu mipa 13 leh hmeichhia pali an ni a; ZMC laboratory-ah mi pakhat, TrueNAT-PCR leh Rapid Antigen Test (RAT) hmangin mi pariat ve ve hmuh chhuah a ni.

Nimin khan Covid-19 veite enkawlna hmun aṭangin hripui laka fihlim tawh mi 16 chhuahtir an ni a; Zokhawsang, Champhai leh Lawngtlai CCC-te aṭangin mi pali ṭheuh, SRH-ZMC, Durtlang BSUP, Kolasib leh Saitual CCC-te aṭangin mi pakhat ṭheuh an chhuak.

Mizoramah Covid-19 positive mi 3,994 hmuh chhuah a ni tawh a, mipa 2,943 leh hmeichhia 1,051 an ni. Nimin tlai dar 5 thleng khan mi 3,800 (95.14%) chhuahtir an ni tawh a, mi paruk (0.15%) thi tawhin, enkawl mek mi 188 (4.71%) an awm.

Mizorama Covid-19 positive hmuh chhuah tawh mi 3,994 zinga mi 1,888 chu Mizoram chhunga kái an ni a, mi 2,106 chu state páwn aṭanga rawn lût an ni.

December 9, Nilaini khan Mizoramah swab sample 1,286 endik a ni a; ZMC-ah mi 315, TrueNAT-PCR hmangin district 10-ah mi 253 leh RAT hmangin district 10-ah mi 718 endik a ni. Mi 1,286 zingah Covid-19 positive mi 17 (1.32%) an awm.

Mizoram aṭanga swab sample 1,61,036 endik tawh aṭangin Covid-19 vei mi 3,994 hmuh chhuah a ni tawh a, chu chu endik tawh aṭangin 2.48% a ni.

Sorkar thuchhuah tarlan danin, ZMC laboratory-a hripui vei hmuh chhuah thar awmchhun chu Kanan Veng, Aizawla mipa kum 27 mi a ni a, Covid-19 symptom nei niin, hri a kàina hriat chian a ni lo.

TrueNAT-PCR hmanga Covid-19 positive hmuh chhuahte chu mipa leh hmeichhia pali ve ve an ni a, Lunglei, Serchhip leh Lawngtlaia hmuh chhuah an ni. Naupang kum 4 leh kum 5 mi pakhat ve ve telin, a bâk zawng puitling an ni. Pahnih chu Mizoram chhunga kái an ni a, mi dang paruk chu state páwn aṭanga rawn lut an ni thung.

RAT hmanga hmuh chhuahte chu mipa vek, kum 14-84 inkar an ni a; state pawn aṭanga tun hnaia rawn lut mi pakhat tih loh mi dang zawng, mi pasarihte chu tualchhunga kái an ni.

TrueNAT-PCR hmanga hmuh:

JNV, Lunglei - 1: Mipa kum 33, JNV quarantine facility-a awm mek, Bihar aṭanga rawn lut.

Thenzawl - 2: Mipa kum 5, hmeichhia kum 27. Tualchhunga hri kái, symptom nei lo ve ve.

Chawngte - 5: Mipa kum 4 & 35, hmeichhia kum 18 & 30. Tripura aṭanga haw, quarantine facility-a awm mek, symptom nei lo vek.

RAT hmanga hmuh chhuah:

Govt. Complex - 1: Mipa kum 35, private hospital-a inentir tura kal, screening point-a RAT-a endik; hri kaina hriat loh, symptom nei.

Durtlang North - 1: Mipa kum 84, damdawi-ina inentir tura a kalnaa hmuh chhuah; hri kaina hriat loh, symptom nei.

Lunglei Lunglawn - 1: Mipa kum 60, hri a kàina hriat loh, symptom nei lo.

Lunglei Salem Veng - 1: Mipa kum 14, baptisma chang turte sample test-naa hmuh chhuah; hri a kàina hriat loh, symptom nei lo.

Lawngtlai-IV - 1: Mipa kum 24, hri kaina hriat, symptom nei.

Sesawng - 1: Mipa kum 30, LADC election campaign-a Lawngtlaia zin, hri kaina hriat loh, symptom nei lo. Positive tih hmuh chhuah hnuah Aizawlah lâk a ni.

Zonuam, Aizawl - 1: Mipa kum 56, LADC election campaign-a Lawngtlaia zin; hri kaina hriat loh, symptom nei. Positive tih hmuh chhuah hnuah Aizawlah lâk a ni.

Chhingchhip - 1: Mipa kum 23, Prem Kram Infracon-a thawk, state páwn aṭanga rawn lut, symptom nei lo.