LADC MDC inthlana campaign tura Aizawl aṭanga kalte'n hripui an kái
December 9, Nilaini khan Mizoramah Covid-19 vei hmuh chhuah mi 17 zingah Mizoram chhunga hri kái mi 10 an awm. Tualchhunga hri kái zinga pahnih chu December 4, 2020-a LADC MDC inthlanpui neihnaa campaign tura Aizawl lam aṭanga kalte an ni.
Sorkar thuchhuah aṭanga a lan danin, Nilainia hripui vei hmuh chhuah, tualchhunga hri kai mi 10 zingah hri an kai ṭanna hriat loh mi pasarih leh natna (Covid-19 symptom) lang chhuak mi paruk an awm. An zingah naupang kum 4 mi a tel a; kum 84 mi, hri kàina hriat loh leh symptom nei a tel bawk.
Tualchhunga hri kái zinga pahnih chu political party hruaitute zinga mi, December 4, 2020-a Lai Autonomous District Council (LADC) MDC inthlanpuia campaign tura Aizawl lam aṭanga kalte an ni a; Zonuam, Aizawl mi leh Sesawng khaw mite niin, Lawngtlaia RAT hmanga sample endiknaa hmuh chhuah an ni. Zonuama mi zawk hian Covid-19 symptom a nei.
Thu dawn danin, Mizoramah chuan Lawngtlai district hi tun hnai chawlhkar hnih vel chhunga hripui vei hmuh chhuah tamna ber district a ni a; an district páwn lam aṭang pawhin campaign-a kal mi eng emaw zat an awm a ni. Aizawl lam aṭanga campaign tura kal zinga Covid-19 positive hmuh thar pahnihte hi hri an kai tih hmuh a nih hnuah Aizawl lamah hruai an ni.