Medical college tur buatsaih mek zel MCI-in December 15 hmain a endik dawn
State Referral Hospital chu medical college atan buatsaih mek zel a ni. Kumin chhungin thawktu ṭhahnem tak dah belh tawh niin, tunah hian thawktu mi 230 vel an awm. Medical college din tura ngenna chu Mizoram sorkarin kumin June-July chhungin a thehlut dawn a, Medical Council of India (MCI) chuan December 15, 2016 hmain an rawn endik ang.
State Referral Hospital-a deputy medical superintendent Dr Jane R Ralte-in Vanglaini palai zawhna chhanga a sawi danin, Mizoram Institute of Medical Education and Research (MIMER) din tur hian Referral Hospital Falkawn chu cheibâwl mek a ni a; department hawn belh zel a nih bakah, thawktu dah mek zel a ni.
Tun dinhmunah Out Patient Department (OPD)-ah department 13 a awm tawh a; chungte chu - AYUSH, Dermatology, Paediatric, Dental, Orthopaedic,Obstetrics and Gynecology, Surgery, Medicine, Eye, ENT, Pathology, Anaesthesiology leh Physical Medicine & Rehabilitation te a ni. Hospital Administration department a awm bawk.
Damdawi-in ward bikah erawh chuan OPD-a awm department zawng zawngin ward an la nei lo thung.
Medical college bul ṭanna atan a tlem berah khum 250 a ngaih laiin, tunah chuan khum 150 chiah a la awm tih sawiin, Dr Jane Ralte chuan, tuna an khum neihte chu a khat ve deuh reng tawh tih a sawi.
OPD-ah ni tin mi 250 tal an inentir tur a ni tih sawiin, "Tunah chuan chawhrualin ni tin mi 100 vel inentir ang an ni. Inentir pawh an pung zel a, ni khata mi 150 vel inentir
ṭumte pawh a awm. Kum 2013 tawp lamah ni khatah mi 25-30 vel chiah an inentir a, nikum lamah ni khatah mi 50 vel an inentir tlangpui," a ti.
Dr Jane R Ralte chuan, medical college din tura ngenna, application form chu kumin June 15 leh July 7 inkarah MCI-ah thehluh a ngaih thu a sawi a, "MCI-in kumin December 15 hmain an rawn endik ang," a ti a; medical college din a nih ngei theih nan nasa taka hmalak mek a nih thu a sawi.
State Referral Hospital Dy. Medical Superintendent dawi danin, damdawi-in chei leh sak belh hna hi HSCC-in an thawk mek a, classroom turte leh library turte buatsaih mek a ni.
Medical college tling turin ICU-ah khum 20 a awm a ngai a, chu chu an siam mek. Operation theatre ngai zat pali chu an nei sa a; Casualty-ah khum 10 tal a awm a ngaih bakah, ward tinah khum 30 tal a awm a ngai. Blood bank neih a ngai a, blood bank nei turin sorkarah dil an tum mek.
Medical college atana inbuatsaih nan hian Mizoram sorkarin state matching share cheng vbc. 5.6 a pek chhuah tawh leh, sorkar laipui
aṭanga sum an hmuh tawh cheng vbc. 20 chu hman a ni.
State Referral Hospital-ah hian tun dinhmunah doctor 38 an awm a, nurse 89, technical staff 39, clerical staff pakua leh group-D staff 53 an awm. Thawktu awm zat hian medical college tura thawktu ngai zat erawh a la pha lo hle thung.
Medical college dinna tura sum ruahman chu cheng vbc. 189 a ni a, chu chu Central sorkarin 90% (vbc. 170.1) tumin, Mizoram sorkarin 10% (vbc. 18.9) a tum ang.
Sorkar laipui sum tum tur hi first instalment-ah cheng vbc. 50, second instalment-ah vbc. 75 leh third instalment-ah vbc. 45 pek chhuah tura ruahman a ni. Tun dinhmunah sorkar laipuiin cheng vbc. 20 leh Mizoram sorkarin cheng vbc. 5.6 a pe chhuak tawh.
Medical college tana sum ruahman
Hmanna tur Sum zat
1. Medical college building Vbc. 69
2. Student/faculty hostel Vbc. 40
3. Hmanrua/bungrua leina Vbc. 50
4. District hospital tihchangtlunna Vbc. 30
Total Vbc. 189