Thli leh rial vangin Mamit district-ah in 332 vel a chhia
April 16, 2016 zing dar 4 vela thli tleh vangin Mamit khawpui chhungah in leh biak-in 100 vel a chhia a; April 15 zinga thli tleh vangin West Phaileng leh a chhehvelah in 232 a chhe bawk.
Mamit khawpuia thlipuiin in a tihchhiat zat chu 100 vel a ni a, chung zinga chenna in 16 chu luah zui tlak a ni lo. In dangte chu a chung leh a bang chhiate a ni hlawm.
Mamit Hmarvenga Seventhday Adventist biak-in pawh thliin a len chhe vek a, sikulte pawh a chhia a; electric ban pakua a tlu a, thing tlu leh thing zár tliak eng emaw zat a awm.
Thlipui tleh hian in eng emaw zat tichhe mah se, mihring thi leh hliam an awm lo. Electric ban tlu leh âwn bakah, thing tlu leh a zár tliakin electric hrui a tihchah avangin hmun eng emaw zatah power line a chhia a; Power & Electricity department hotute chuan, electric line siam ṭhat hnain hun a duh deuh tur thu an sawi.
Mamit DC Lalbiaksangi chuan thliin in a tihchhiatte chu Inrinni zing khan a tlawh kual a, V/C hrang hrangte hnenah silpauline leh chhawmdawl hna thawktu hnatlangte thingpui lumna sen-so atan Rs. 1,000 zel a pe.
Bialtu MLA, minister John Rotluang-liana'n V/C panga hnenah hnatlangte ei leh in senso atan Rs. 5,000 ṭheuh a pe bawk.
Inrinni chhun khan DC Lal-biaksangi hoin Mamit District Disaster Management Authority an ṭhukhawm a, chhawmdawlna hna thawh dan tur leh sorkar
aṭanga ṭanpuina awm thei tur angte an ngaihtuah a ni.
April 15, Zirtawpni zing dar 4-5 vela thlipui tleh leh rial tlain West Phaileng leh a chhehvel khuaah in eng emaw zat a tichhia a; chu'ngte chu April 15 vek khan West Phaileng SDO(C) Lalvenhima'n a tlawh kual a ni.
Thu dawn danin, West Phailengah hian in 172 a chhia a, chu'ng zinga 40 vel chu thli leh rial-in luah zui tlak lohin an tichhia. In chhia zingah hian sorkar in 13, biak-in pathum leh sikulte a tel.
Khawhnai khuaah in chhia 27 a chhia a, chu'ng zinga 10 chu luah zui tlak loh a ni. Tuirum khuaah in 33 a chhia a; luah zui tlak lohin in pahnih a tlu a, in tlu hian Lalpiang-thari a delh a, hliam na lutuk lo mahse West Phaileng damdawi-inah lak a ni.
Inriini zing vek khan, dar 7 vela ruahsur leh thli tlehin Serchhip district-a Lungpho khuaah Lal-
ṭhakima in leh Tlang-timawia in a tichhia. Lal-
ṭhakima in hi a chung lehlam zawng in chhun, a chúm leh rangvate thliin lên phawkin, in aṭanga metre 40 vela hláah a lên a; Tlangtimawia in pawh a sira a tihzauhna do-er chin zawng a laksak a ni. In chhiate hi Inriini khan hnatlangin thawm ṭhat a ni a; hnatlangte ei leh in senso atan bialtu MLA Lalrinawma'n Rs. 1,500 a pe a ni.
Inrinni zan dar 8 vela thli tlehin Hmunnghak khuaa Ziona in chu a lèn darh vek bawk a, in neitute erawh chu an insaseng hman avangin thi leh hliam an awm lo.