KHAWTHLIR

ILP nei lo man

Aizawl district police-te chuan April 15-16, 2016 khan Aizawlah Inner Line Permit (ILP) nei lo dap chhuah rûnpui an nei a, ILP nei lo mi 55 man-in, an ramah an thawn haw. Police-te chuan, ILP nei lo dap chhuah hna ngawrh zawka neih zel an tum thu an puang.

Basketball Court hawng

Rs.4,40,000 senga siam Bethlehem Vengthlang Basketball Court chu Inrinni khan bialtu councillor C Lalsawivunga'n a hawng. Court siamna atan hian Bethlehem VT Govt. Middle School-in an ram an hman tir a, a siamna atan bialtu councillor-in Rs.2,95,000, Mizoram State Sports Council-in Rs.50,000 leh fibre board, NECS-in Rs.50,000 leh K Liantlinga'n Rs.45,000 an tum a ni.

Thisen pe

Inrinni khan Ramhlun Vengthlang branch KṬP chuan, an branch din champha pualin Aizawl Civil Hospital tan unit 34 an pe a, a petute mipa 26 leh hmeichhia pakua an ni. Lunglei Chanmari Bial PYD pawhin Lung-lei Civil Hospital tan unit 28 an pe a, a petute mipa 20 leh hmeichhia pariat an ni.

Tanpuina pe

Champhai South bialtu MLA JH Roṭhuama chuan tun hnai khan a bial chhung, Melbûk khua a tlawh a, April thla tira thli tlehin a tihchhiat primary school leh middle school-te tlawhin, a siamṭhatna atan pawisa leh rangva a pe.

Lungin motor delh

Inrinni zing dar 6:30 vel khan Ngaizel kawngpui chung khâm aṭanga lung tlain kawngpuia maxi-cab tlan lai, Tuipang, Saiha district pantu chu a delh. Motor khalhtu HC Jeremy chu hliamin, Alpha Hospital, Kulikawn panpui a ni a, Lallawma, Ràwlbûk khua na vak loin a hliam bawk.

Biak-in hawng

Tualpui Presbyterian Kohhran biak-in sak thar chu Inrinni khan Synod moderator Rev. H Lalrinmawia'n hawngin, Pathian hnenah a hlan. Biak-in sak nan hian Rs. 49,71,614 an sêng a, a dung ft. 53 leh a chanve, a vâng ft. 40 a ni.