Chief Minister-in Khampat Bûngpui Humhimna tur ngaihtuahpui a tum

Chief minister Lal Thanhawla chuan, Mizo chanchina pawimawhna thûk tak nei Khampat Bûngpui humhimna tur ngaihtuahpui a tum thu leh, kumina Tahan, Myanmar-a Chapchar Kût hmanna khelmual chei nan sum an thawh tur thu a sawi.

CM Lal Thanhawla hian Inrinni khan CMO conference hall-ah thuthar thehdarhtute kâwmin, Tahan-a Chapchar Kut a hmanpuina leh Myanmar ram hmun hrang hrang a tlawh kual chanchin a hrilh a; 'Zo hnahthlak zawng zawngte hian Mizoram hi an Jerusalem-ah an ngai vek a, Jerusalem luahlumtute hian zir tur tam tak kan nei a ni," a ti.

Lal Thanhawla chuan, April 8, 2016-ah Khampat Bûngpui an tlawh thu sawiin, "Khampat Bungpui hi a zárte tla nasa tawh mah se, Khampat Bûng a nih hian a hlutna a la ngai reng a ni," a ti a; Khampat Bung thlanga lei a min zel loh nan a venna siam a ngaih avangin, retaining wall siam dan tur an ngaihtuahpui tur thu a sawi.

Mandalay-a Indian Consul General pawhin Ministry of External Affairs-in an remtih chuan, Khampat Bung chu Mizo heritage a nih avangin Indian Consulate office lamin a humhimna tur hna an lo thawhsak theih tur thu a hrilh tih CM Hawla chuan a sawi a; Central YMA lamin hmalak an tum thu a sawi bawk.

Chief Minister hian Kalay University, Wesley Methodist Hospital, Bible Seminary leh Mizo khaw hrang hrang an tlawh a; Kalay University leh Mizoram University-te thawhho theih nan sorkar laipuiah hmalak a tum thu sawiin, "Anni pawhin an duh hle a ni," a ti. Wesley Methodist Hospital-in oxygen plant leh water treatment plant an nei tih sawiin, "Oxygen-ah an intodelh thei a, an entawntlak hle," a ti.

Myanmar-a Mizote zingah sorkar hna thawh thawk duh an awm lo tih sawiin, Hawla chuan, "Anmahnia an eizawnnaah sum an lalut ṭha zawk a, an hmalaknaah sorkarin min tihsak rawh se, an ti ngai lo. Khelmual, kawng leh thil dangah sorkara innghat loin sum an thawh khawm a, an siam mai ṭhin," a ti a; Mizoramah erawh chuan mipuite'n sorkarah duh leh mamawh an ngah a, an tihsak vek theih si loh avangin hrehawm an tih thu a sawi.

Myanmar-a Mizo ṭhalaite'n hna thawh hreh an nei lo tih sawiin, an upate pawh ṭhalaite chungah an lawm hle tih a sawi a, "Hna an thawk nasa a, mahni an intodelh a, keini ai chuan an khawsa nuam tawh. Chu chuan society a siam ṭha hle a ni," a ti.

Lal Thanhawla chuan, Myanmar-a Mizote an hawihhâwm thu leh mikhual chungah an ṭhat thu sawiin, Mizorama mite'n an hnen aṭangin zir tur tam tak an neih thu a sawi.

Chief Minister chuan, Myanmar-a Mizote zingah mi tlemtê tih loh chuan inzawmkhawm an duh veka a hriat thu sawiin, "Sorkarin a ngaih pawimawh thama awm an duh niin ka hria," a ti.

Zo hnahthlakte engtikah emaw rorelna pakhat hnuaia an la awmho ngei a rin thu sawiin, "Ralthuam cheleka nawr chi a ni lo a, Pathian remruata innghah mai a ngai. Ralthuam chelek zawng chuan min dotu an tam lutuk dawn," a ti.

Myanmar leh press conference-a Chief Minister ṭawiawm-tu Joseph Lalhimpuia, parliamentary secretary chuan, CM lal Thanhawla a zin avangin Myanmar sorkarin Mizote an en dan a danglam vek niin a sawi a, "Kan CM hian Zo hnahthlakte hmel a tidanglam a, Zo hnathlakte hi min hûi khawm a ni," a ti.

CM Lal Thanhawla press conference-ah hian Tahan-a Chapchar Kût hmanga kal ve Central YMA leh MZP hruaitute pawhin Myanmar-a an thil tawnte an sawi. CYMA hruaitute chuan Mizo mipuite sum thawhkhawm hmanga Myanmar-a tuilian tuar Zo hnahthlakte ṭanpuina an pek hmanga hna thawh dante an en nghal a ni.