Lo hâl tlai mi eng emaw zat man

Sorkarin lo hâl hun hnuhnung an bituk, March 15, 2016 hnu lama lo hâl nia hriat, Mamit khawpui chhunga mi eng emaw zat chu April 15, 2016 khan Mamit police-te'n an man a, bail-a chhuah leh nghal an ni.

Mamit aṭanga thu dawn danin, sorkarin March 15 ral hmaa lo hâl vek tur a tih chu Mamit district-a lo neitu eng emaw zatin an zâwm loa hriat a nih avangin Mamit DC Lalbiaksangi chuan Mamit Police Station-ah FIR a thehlut a; Mamit PS-ah hian case no. 15/16 Dt. 13/4/2016 U/S 188 IPC ziah luh a ni.

Police-te chuan Mamit Hmarveng V/C huam chhunga mi 36 chu sorkar thu zâwm loa puh an nih avangin thu zawhfiah atan an man a; Mamit PS huam chhunga khaw hrang hrangah mi dang 125 man an ni bawk. Police-in an mante chu thu zawhfiah an nih hnuah bail-ah chhuah an ni.

Hetih lai hian, Mamit police-te chuan ram tikângtua puh mi paruk thubuai an siamsak bawk.

Mamit police-te chuan vawiin lam hian Mamit Venghlun, North Sabual, Suarhliap, Khanthuam leh Kananthar khuaa March 15, 2016 hnu lama lo hâl nia puh mi eng emaw zat man leh an tuma thu dawn a ni.

Sorkar thupek bawhchhiaa puhte hi Court-in thiam loh a chantir chuan IPC Section 188 hmangin hrem theih an ni a, Rs. 200 chawi emaw, thla khat chhung tàn emaw, a pahnih a hrem theih an ni.

Hetih lai hian, lo neitute chuan an duh rêng vang leh sorkar thupek an awih loh hrim hrim vanga lo hâl tlai an nih loh thu leh, March 12 leh 13 zanah ruah tam tak a sûr vang leh vahchapte a ro ṭhat hman loh vanga hâl tlai an nih thu an sawi thung.