Biate-ah 'Chhanchhuahna Ni' an hmang

Biate khuaa kohhran hrang hrangte chuan, nimin khan 'Chhanchhuahna Ni' an hmang. Chhanchhuahna Ni hi rambuai lai, April 17, 1966-a sipaite laka Biate khua chhanchhuahna ni hriatrengna a ni.

Thu dawn danin, Mizoram buai lai khan Biate khua chu bomb leh silai hmanga beih tum a ni a, mahse, biak-in dár a rîk avangin nunau inkhawm tura kalte chu sipaite'n kâp loin an ṭînsan a ni. India sipaite chêt tumna hi report dik lo an dawn vang niin an sawi.

India sipaite chuan 'Bia-te-ah volunteer an khat tlat a, nunau chu dai páwnah an ûm chhuak vek,' tih thu an dawng a, Biate chu beih tumin an che chhuak. April 16, 1966, Inrinni-ah indo thlawhna (fighter) pahnih chu Biate khaw chungah an thlawk kual bawk.

April 17, 1966 (Pathianni) chhunah Bungzung lam leh Sialhawk lam aṭangin sipai eng emaw zat Biate-ah an lut a, khaw dáiah bomb an tihpuah bakah, silai an hmet puak nual. Chawhnu inkhawm dár a ri a, khuang riin a zui nghal a, mipuite pawh inkhawm turin an kal a; sipaite chuan kah-ên var kâpin, silai leh bomb an hmang ta lo a ni.

Sipaite chuan Zawlbuk kawtah mipui an ko khawm a, an commanding officer chuan, "Biate hi vaivuta siam tumin kan lo thawk a, mahse, in biak-in dár ri leh khuang ri kha ring takin ka bengah a ri a, nunau in awm tih ka hria a, kan bei thei ta lo che u a ni. In Pathianin a hum che u a nih hi..." tiin a sawi.

Biate khua chuan biak-in dár ri leh inkhawm turin sipai lakah Pathianin an khua a hum niin an ngai a; sipaite chu Champhaia an haw hnuah Biate V/C-te chu Champhaiah kalin, lawmthu hrilh an tum a ni. Sipai CO chuan, Pathian hnena lawm-thu hrilh zawk turin a lo hrilh niin an sawi.

India sipaite laka chhanchhuaktua an ngaih biak-in dár chu tun thlengin an la hmang a, nimina 'Chhanchhuahna Ni' an hmannaah pawh dár hi an vaw leh a ni.