MR zirtirtute thawh hun tun thlaah a tàwp dawn

Mizoram sorkarin muster roll (MR)-a a chhawr zirtirtu 800 chuangte thawh hun chhung chu tun thla (February) tàwpah a tàwp dawn. School Education department chuan MR zirtirtute rawih chhunzawm phalna Department of Personnel and Administrative Reforms (DPAR)-ah an dil mek.

MR zirtirtute hi engagement order an peka an thawh hun chhung tur tarlan chu October 14, 2019 aṭanga February 29, 2020 a ni. Vanglaini palai zawhna chhangin School Education department hotute chuan, MR zirtirtute an thawh chhunzawm leh theihna turin dan angin DPAR-ah dilna thehluh a ngaih thu an sawi a, "DPAR hriatpuina thlapa lâkte chu rawih chhunzawm an remti zel," an ti.

School Education department hotute sawi danin, MR zirtirtute chu October 14, 2019 aṭanga February 29, 2020 atana rawih phawt an nih chhan chu - February 2020 thleng bak chu budget thara hlawh pek a ngaih vang a ni. Rawih chhunzawm an nih chuan, dan pangngai angin kum khat chhung atana rawih an ni ang.