Tourism project kal lai 20 tihtawp a ni Project thar hnuaiah vbc. 180 hmu tawh

Mizoram sorkara Tourism department-in, khualzinte hîpna kaihhnawiha hna an thawh kal lai 20 chu sorkar laipuia BJP kaihhruai NDA sorkar a din hnuah tihtawp a ni. Hetih lai hian, sorkar laipui chuan project hming thar pahnih kalpui tur siamin, project pakhat zawkah Reiek, Thenzawl leh South Zote-a hmun cheibâwl nan cheng vbc. 960 a dah a, vbc. 180 an rawn pe tawh.

Planning & Programme Imple-mentation secretary Dr C Vanlal-ramsanga chuan, NDA sorkar hnuah sorkar laipuiin kalphung a thlak avangin khualzinte hîpna atana hna thawh kal laite tihtawp a ni tih a sawi a, "Hna tihtawpte chu thawh chhunzawm a nih theih nan Mizoram sorkarin Central-a hotute hnenah ngenna thlen ṭhin mah se, a la hlawhtling thei lo," a ti.

Tourism department hotute sawi danin, Central-a NDA sorkar a pian hnuah CSS hnuaia project kal laite tihtawp a ni a, chutah chuan Tourist department-a project kal lai 20 pawh a tel.

Contractor-te'n hna an thawh laklawh avangin hna chhunzawm a nih theih nan chief minister Lal Thanhawla leh Tourism minister John Rotluangliana ten Central-ah ngenna an thlen ṭhin a, mahse, tun thlengin a la hlawhtling thei lo.

Tourism hotute sawi danin, sorkar laipuiin Tourism-ah project chi hnih Prasad leh Swadesh Darshan an kalpui thar a, Prasad chu sakhuana lam hawia khualzin hîpna tura ruahman a ni. Prasad chu Mizoramah tihhlawhtlin a harsa deuh tura ngaih a ni a, Swadesh Darshan erawh chu Mizorama kalpui theih tura ngai a ni.

Swadesh Darshan hnuaiah 'Integrated development of new eco-tourism under Swadesh Dar-shan North East circuit at Then-zawl, South Zote & Reiek' tiin project kalpui a ni dawn.

Reieka Zo khua chu siam ṭhata tihchangtlun tum a ni a, South Zote-ah trekking route siam tum niin, Thenzawlah golf course din tum a ni. Heng atan hian Central-in March 2016 khan cheng vbc. 180 a rawn pe tawh a, April 2016-ah hna ṭan tum a ni.

Swadesh Darshan hnuaiah vek hian Aizawl leh a chhehvelah khualzin híp thei tur chi hrang hrang din tum a nih thu Tourism department hotute chuan an sawi a; state danga an tih angin, mimal inte chu khualzinte thlenna tura cheibâwl a, NLUP aṭanga cheng nuai khat peka hmalak mai ṭha an tih thu sawiin, "Rajasthan, Gujarat, Kerela, Shillong leh India rama state tam takah an kalpui tawh a, in neitute pawhin an duh mai a rinawm," an ti.

Dr C Vanlalramsanga chuan, mimal ina khualzin thlenna siamna tur, 'Community based tourism promotion' ang chi chu Himalayan region-ah te, Europe ram ṭhenkhat leh India ram hmun hrang hrangah an uar tawh thu leh khualzinte pawhin ṭha an tih thu a sawi a, "Thingtlang mite tan hmasawnna a ni a, khualzinte thlen nan an in chhâwng khat an siam a, ṭawng thiam loh pawhin zaizirtein an inbia a, an ei leh in ang an ei mai a, khualzinte'n nuam an ti hle. Khualzin hîp tak tak tur chuan a bulthûm aṭanga ṭan tur kan ngah hle a ni," a ti.

'Community based tourism promotion' kalpui tur hian Tourism department chu ruahmannate siam chhin tura tih an nih thu sawiin, Vanlalramsanga chuan, "Tourism policy chu felfai zawka neih a pawimawh hle a ni," a ti a; Mizorama lirthei hman man to chu khualzinte'n harsatna an tawh phah thu te, tourist taxi awmin,
ṭawng thiam leh fel takte'n khalh se ṭhaa a hriat thu te, Mizorama hotel neitute'n khualzinte hnenah Mizo hmel tibâl thei chi lama kal turin kawhhmuh lo se ṭha a tih thute a sawi.

Tourism department hotute chuan, kum 1987 aṭangin an hmalakna hrang hrangah Central aṭanga sum an dil chhuah an hmang ber tih an sawi a, Mizoram sorkar
aṭangin sum an hmuh ngai meuh loh thu an sawi bawk.