MNF-in Lok Sabha MP candidate atan Rajya Sabha MP K Vanlalvena an ruat

MNF party chuan kumina Lok Sabha inthlana an candidate atan K Vanlalvena, Rajya Sabha MP ni lai an ruat. K Vanlalvena chuan, "Pathian leh kan ram tan ka rawn pên chhuak dawn a ni," a ti a; MNF president Zoramthanga chuan, NDA sorkar do na ngam ber chu MNF an nih thu a sawi.

Nimin khan Mizo Hnam Rûnah MNF Lok Sabha MP can­didate tur puanna inkhawm neih a ni a, MNF presi­­dent Zoramthanga'n an candidate tur chu K Van­lalvena a nih thu a puang a ni.

MNF President chuan, NDA chu political party hrang hrang awm khawmna a nih thu leh MNF chuan an thuthlung an kalsan ngai loh thu sawiin, "India nen kan inremnaah pawh Mizote sakhua humhimna turin kan nawr tlu. Kan hnam himna nghawng thei thilah NDA sorkar do zawngin kan kal zel. NDA do na ngam ber chu tute nge, MNF kan ni," a ti.

Zoramthanga chuan, "Parliament House-ah Mizote tan tu nge huaisen ber ang? Pu Vena hi tun dinhmuna kan hriat leh kan hmuh mek, Paliament-a kan mi huaisen, kan Chawngbawla a ni," a ti a; Citizenship (Amendment) Act, Free Movement Regime, Mizoram leh Assam ramri chungchang leh Manipur buainaah MNF-in an dinna an la sawhsawn ngai loh thu leh Rajya Sabha MP ni mek K Vanlalvena chu Mizoram mipui aiawhtu leh thil ṭha tam tak titu a nih thu a sawi.

MNF President chuan, eptu ni chunga MP inthlan hmachhawn chu a huphurhawm thu a sawi rualin, Pathian remruat a thlen chuan MNF chu an chak ṭhin thu a sawi a, "Tunah hian MNF ni lo, Congress ni lo enchhin hunah kan awm. MNF sorkar kha la ding zui ni se, min beitute min vawmna kg. 1 kha tunah chuan kg. 2 a ni hial tawh ang. Kum 2028-ah chuan kan chhe nasa hle ang. Hei vang hian Pathianin MNF-te min thukru rih a ni," a ti.

MNF candidate tur K Vanlalvena pawhin thu sawiin, "Inthlan campaign nan sum leh pai ka nei lo. Pi leh pu aṭangin belhfâkawm chhuan tur ka nei lo. Mipui khawngaih beiseiin Pathian leh kan ram tan ka rawn pên chhuak dawn a ni," a ti a; MP candidate atana ruat a ni chu lawmawm a tih thu a sawi.

K Vanlalvena chuan, NDA leh INDIA inepna karah regional party-te an tel ve dawn tih sawiin, "Mizoram MP chuan sorkar siamnaah kori kan tu phâk lo. NDA hi a sorkar leh ngei a rinawm a, Uniform Civil Code an rawn tihpuitlin pawh a rinawm. Chuvangin, NDA sorkar do a ṭul nasa dawn a, term kal mekah NDA sorkar dodal nasa ber pawl ka ni. MP fáng tan thil tih a harsa a, amaherawhchu, au bengchhen a ngai... Lok Sabha-ah hian min thlang tling a nih chuan Mizo ṭawngin thu ka la sawi ang," a ti.