ZPM MP candidate-in hming a pe lut

April 19, 2024-a Mizorama Lok Sabha inthlanpui awm tura ZPM party candidate Richard Vanlalhmangaiha chuan nimin khan returning officer Nazuk Kumar, Aizawl district election officer hnenah nomination paper a thehlut.

Nomination a thehluh zawha thuthar thehdarhtute zawhna chhangin Richard Vanlalhmangaiha chuan, thlan tlin a nih ngei a inrin thu leh thlan tlin a nih chuan central-ah Mizoram hmasawnna tur a tam thei ang ber sawichhuah a tum thu a sawi a; a khingpui turte chu fel tak tak an nih thu sawiin, "Nikum maiah mipuiin ZPM an thlang tling a, mipuiin duh taka an thlan ZPM candidate ka nih avangin beiseina ka nei sang," a ti.

Thlan tlin a niha Parliament House-a a ṭhutna tur zawhna chu Richard Vanlalhmangaiha chuan, an party hotu sangin an la ngaihtuah tur thuin a chháng.

Richard Vanlalhmangaiha'n nomination a thehluhnaah hian ZPM president Lalliansawta, chief minister Lalduhoma leh party hruaitu dangte'n an ṭawiawm a ni.