AMC corporator John-a ruang vawiinah a rawn thleng dawn

Aizawl Municipal Corporation (AMC) Ward-VI bialtu corporator John Zosangliana Ralte (49) h/o Lalrinfeli, Chanmari West chu March 21, Ningani zan dar 8:58 khan lungphu châwlin New Delhi-ah a thi a; vawiin chawhnu lamah a ruang a rawn thlen beisei a ni.

Vanglaini thu dawn danin, John Zosangliana hi a nupui nen an fate Dehradun-a lehkha zir dahin an zin a, an haw leh lamah Delhi-ah châwlin, Franklin L Khobung, IFS-te inah an thleng a, March 22, nimina Aizawla rawn haw tum an ni.

March 21, Ningani chaw­hnu khan a pum lam nawm loh avang leh khaw­sik avangin an inentir a, harsatna lian tham nei loin an thlennaah an haw leh a ni. Zan dar 8 vela a nupui ṭap thâwm an hria a, an thlenna Franklin Khawbung-te chhungkuain buaipuiin, Primus Hospital an panpui nghal a, damdawi-in an thlen chuan a thi tawh.

John Zosangliana Ralte hi damdawi-ina thi a nih loh avangin nimin khan Safdarjung Hospital-ah a ruang endik (postmotem) a ni a, Delhi Mizoram House-a thuneitute leh Mizo Welfare Association, Delhi hruaitute leh member-te'n an buaipui a ni. Nizan khan MWA, Delhi-in Mizoram House-ah an thlah.

Corporator John Zosangliana ruang hi vawiin chawhnuah Lengpui Airport thlenpui beisei a ni a; vui hun tur chu nizan khan Chanmari West Branch YMA-in an rêl a ni.