BJP sorkarin Congress party dik lo taka beiin a hrêk mek - MPCC Vice President

Mizoram Pradesh Congress Commit-tee (MPCC) vice president Lalnunmawia Chuaungo chuan nimin khan Aizawl Press Club-ah thuthar thehdarhtute a kâwm a; sorkar laipuia BJP sorkarin Lok Sabha inthlanpuiah Congress party chu sum leh paiah dik lo taka beiin a hrêk mek niin a sawi.

Lalnunmawia Chuaungo chuan, BJP sorkarin Lok Sabha inthlan awm turah tlin leh ngei tumin nasa taka hma a lak thu te, CBI, Enforcement Directorate leh Income Tax department-te dik hlel taka hmanruaah hmangin, BJP paihthla thei tura an ngaih political party leh politician pawimawhte an beih mek thute a sawi a ni.

Indian National Congress (INC) chu Indian National Democratic Inclusive Alliance (INDIA) hruaitu leh eptu party lian ber a nih avang leh, Lok Sabha inthlan tura BJP kawng dâltu lian ber a nih avangin BJP sorkarin hmanraw hrang hrangin a bei mek niin a sawi a, "Chu'ng zinga pakhat chu Income Tax department leh Enforcement Directorate hmanga INC sum hnár chhut chah a ni," a ti.

MPCC Vice President chuan, BJP sorkarin Electoral Bond Scheme a tichhuak tih sawiin, "He scheme hmang hian BJP chuan cheng vbc. 8,250 chuang pawisa a dawng tawh. Scheme hi dik lo takin BJP sorkar chuan hmangin mimal leh company tam tak, Income Tax department leh Enforcement Directorate-te kaltlanga tihluihna hmangin BJP tan pawisa an thawhtir ṭhin," a ti. BJP sorkarin dik lo taka Electoral Bond Scheme a hman avangin Supreme Court-ah khin a nih thu leh Supreme Court chuan scheme chu a dik lo a ti a, a hnâwl (quash) tawh thu a sawi bawk.

MPCC VICE PRESIDENT THUSAWI

■ Political party-te chu Income Tax Act Section 13A hnuaiah income tax àwl an ni.

■ Donation an dawnna hnár hriat theih loa pawisa faia donation an dawn aṭangin income tax an pek a ngai thung.

■ Kum 2018-19 Income Tax assessment year khan INC-in sum a hmuh chu cheng vbc. 199 a ni a, MLA leh MP-te aṭanga pawisa an dawn chu cheng nuai 14.40 a ni.

■ Lok Sabha inthlanpui kum a nih avangin Income Tax Return a huna file hman loin ni 45-in an tlai. Income Tax department chuan income tax leh penalty cheng vbc. 210 pe turin INC a phût.

■ INC-in income tax a pek tur chu cheng nuai 14.40 aṭanga chhût tur a nih laiin, cheng vbc. 210 lai a phût a ni.

■ INC chuan Income Tax Appealate Tribunal (ITAT)-ah a appeal a, tunah a kal mek.

■ Appeal case a kal mek chungin Income Tax department-in chhuanlam siamin INC bank account 11 a titáng (freeze) a, cheng vbc. 210 a hrênsak bakah INC-in bank account-a pawisa a neih dangte pawh khawih chet theih lohin harsatna a siamsak.

■ BJP sorkarin kum 30 hma lama INC-in Income Tax Return a file-te pawh ching chhuak lehin, kum 1993-94 a Income Tax Return chungchangah INC chu notice pein harsatna siam belh tumin hma a la mek.

■ Dik lo taka INC laka hmalak a nih avang hian Lok Sabha inthlan awm tur atana Congress party inbuatsaihna a khaihlak.

■ February 26, 2024 khan Assam Legislative Assembly chuan The Assam Healing (Prevention of Evil) Practices Bill, 2024 a pass. He dan hi hman a nih hnuah chuan missionary-te'n ṭawngṭaia tihdam rawngbawlna neih khap a ni dawn.

■ BJP thil tum ber chu India ram hi Hindu rama siam a ni a, Kristiante hi hnawk min tihna lian tak an nei.