MIMA-in ILP Board din turin CM ngen

Mizoram Merchant Association (MIMA) chuan Mizo ram leh hnam tan Inner Line Permit (ILP) Board din ni se, tiin chief minister Lalduhoma hnenah an thlen a, "Iron rod leh cement zuarah chuan Mizo hming hawha vaiin dawr an siam hi 90% vel a ni tawh," an ti.

MIMA hruaitute chuan March 21, Ningani khan CM Lalduhoma an hmu a; ILP pek dan a felfai tâwk loh thu te, ILP pek tawhte'n an ngaihsak zui loh ṭhin thu leh a dam leh dam loh ngaihtuah zui a nih ṭhin loh thute leh sponsor-tute pawhin an ngaihtuah zui ṭhin loh thute sawiin, ILP enkawltu board hran a awm a hun hle tawha an ngaih thu CM an hrilh.

ILP chu kum hnih aia rei lo dam a nih laiin, kum hnih aia rei nei hnam dang tam tak an awm tawh nia sawiin MIMA hruaitute chuan, "ILP renew loa awm ta mai mai an tam avangin Mizoramin ILP hmanga sum a hmuh tur pawh a hmu pha lo hleah kan ngai. Dan loa lo lut an tam tâk lutuk avangte hian ILP Board din a ṭul hle tawh a ni," an ti.

MIMA hruaitute chuan, Mizoramah dan loa lut hnam dang (vai) an tam tawh hle nia sawiin, "Heng mite hian Mizoram hmun hrang hrangah sumdawngin dawr an siam mai bakah, Mizo hming hawhin dawr an siam a, iron rod leh cement zuarah ngat phei chuan Mizo hming hawha vaiin dawr an siam hi 90% vel a ni tawha hriat a ni," an ti a; sumdawnnaa hnam dang hnena Mizo hming hawhtir chu Mizo hnam hralhna a nih thu an sawi.

Myanmar aṭanga Zo hnahthlak ráltlânte'n sumdawnnate an khawih nasat thu leh ruihhlo a hluar phah hle thu sawiin MIMA hruaitute chuan, "A pawi kan tiin ṭha lo kan ti hle a, dan loa Mizorama rawn lut, duh duha sumdawnna rawn bunte hian chhiah an pe lo a, nasa takin Mizoram sorkarin sum a hmuh tur a hmu lo niin kan hria," an ti a; râltlân zinga sumdawngte tihtàwp dan kawng zawng turin Chief Minister an ngen bawk.