DGP-in dan bawhchhe lo turin a chah

Director General of Police (DGP) Anil Shukla chuan March 21, Ningani khan Kolasib a tlawh a, nimin khan Mamit a tlawh leh bawk a; police-te chu dan bawhchhe lo turin a chah.

Kolasib SP conference hall-a Kolasib police-te nen an inkawmnaah DGP chuan, Kolasib district chu Mizoram mipui ni tin mamawh lak luhna kawngpuiin a paltlang a nih avangin a pawimawh thu a sawi a, "Bungrua chi hrang hrang a luh rualin zu, ruihhlo leh thil dang ṭha lo pawh a luh tel avangin police-te thawhrim bik a ngai," a ti.

Anil Shukla chuan, police duty zingah dan pêla chê an awm thu an dawng ṭhin chu pawi a tih thu sawiin, "Tun hnaia Vairengte Police Checkgate-a thil thleng kha insiamṭhatna atan hmangin, dan bawhchhiat nawn tawh loh a ngai," a ti a, police-te chu hrem ngaia awm lo turin a chah.

Mizoram DGP chuan, lirthei enkawltute hnen aṭangin police ni lo, pawl ṭhenkhatte'n sum leh thil dang an khawn ṭhin nia sawi awm chu tireh turin Kolasib SP-in thuchhuah a siam a ṭul thu a sawi.

Kolasib SP David H Lalthang­liana pawhin thu sawiin, an district-a police station hrang hrang leh District Executive Force dinhmun a sawifiah.

Nimina Mamit SP conference hall-a Mamit district police-te nen an inkawmnaah DGP chuan, police-te chu rinawmna leh taimak­na nen theihtawpa mahni hna ṭheuh hlen turin a fuih.

DGP Anil Shukla hian Mamit Police Station leh Emergency Response Support System (ERSS) Center-te a tlawh a, Mamit Luangpawla 4th IR Battalion hmunpui a tlawh bawk.