Jail tángte tan thiamthil zirna buatsaih

Kolasib District Legal Services Authority chuan Kolasib District Jail-ah chawlhkar khat awh tur thiamthil zirna, 'Skill Development Training for Undertrial Prisoners' an buatsaih a, nimin khan Kolasib bawrhsap John LT Sanga'n a hawng.

John LT Sanga chuan, bul ṭan ṭha leh thei tura jail-a hun hmang mekte'n an hun âwl ṭha taka an hman theih nan eizawnna tlak thiamthil zirna buatsaih a ni chu lawmawm a tih thu a sawi a; tángte chu an thil zirte eizawnna tlaka hman tuma zir turin a fuih.

Kolasib SP David H Thangliana pawhin thu sawiin, insiamṭhatna leh khawtlang tana mi ṭangkai nih theihna tura thiamthil zirna hun ṭha Kolasib DLSA-in tángte tan an buatsaih chu ṭang­kai taka hmang turin duhsakna a hlan.

Training kalpui chhung hian puanṭhui, pangpar khawi, lumeh, ei siam leh mistiri hnate jail-a tángte zirtir a ni ang.

Kolasib District Jail-ah hian mi 136 an awm mek a, mipa 116 leh hmeichhia 20 an ni.