Mizoram-Assam ramri buai laiah Assam mite'n in/dawr 28 an sa
Vairengte leh Lailapur inkara Mizoram leh Assam inrìna báwr vel, ramri buai vanga a tu lam mah mahin kutthlak loh tura tih laiah tun hnai khan Assam lam mite'n NH-54 kawngpui kamah chenna in leh dâwr an sa thar nual a, an luah mek.
Ramri buai laia Assam lam mite'n in an sak tharte chu a ṭhen dawr atan an hmang a, ṭhenkhat erawh chhungkuain an luah a, an awm chilh mek nia thu dawn a ni.
Vairengte auto-rickshaw stand leh Lailapur inkar, ramri buai laia Assam mite'n in an sak tharte chu October 4, Pathianni khan Vairengtea Rengkhawpui chanchinbu enkawltute'n a hmunah an tlawh a, Assam mite hmalak dan an enfiah.
Rengkhawpui Editor hnen aṭanga thu dawn danin, Lailapur chhaka Assam Forest department-in office an sakna chhak bul aṭanga Vairengte Kawngthar Venga auto-rickshaw stand inkarah in leh dawr sak ṭhat 28 vel a awm a, chu'ng zinga in 21 chu luah tawhin, sak mek leh la luah loh pasarih vel a awm. In luah tawh zinga pariat vel chu chhungkuain an luah a, chhungkaw ṭhenkhat chuan rante pawh an vulh a ni.
Assam mite'n tuna in an sak thar lehna hmun chu a hmaa an sak tawhna hmun deuh vek a ni a; dawr an siam thar leh zinga Vairengte hnaih ber chu kum 2007-a MZP-in Zo Rún an sakna chhak daih, auto-rickshaw stand thlang lawkah a ni. Dawr hnai ber thlang lawkah chuan chhungkaw pakhat an awm a; a tam zawk chu Zo Rún sakna thlang lama awm a ni thung. In leh dawr an sakte chu National Highway kawngpui kamah vek a ni.
Vairengte thlanga Mizoram-Assam ramri-ah hian kumin May thla tàwp lam khan Assam-in Mizoram aṭanga Assam lam lut turte enfiahna (screening) an kalpui avangin Vairengte leh Lailapur inkarah khualzin leh driver tangkhang eng emaw zat an awm a; chu chu chhuanlama hmangin Assam lam mite chuan ramri buai lai vel kawngpui kamah dawr an siam a ni. Dawr an siam tirhah chuan dawrte chu khualzin leh driver-te tangkhang an awm loh hnuah ṭhiah leh mai an tum thu an insawi.
Kumin June leh July thla khan Assam mite'n dawr an siam zinga a tam zawk chu Vairengtea police leh ṭhalaite'n an ṭhiat a; mahse, August thla tàwp lam aṭang khan in leh dawrte chu an sa thar leh a ni. Rengkhawpui Editor chuan, tun ṭuma Assam mite'n in an sak chu a hmaa mite aiin a ṭha zawk daih a, inbenbel an tum ṭan nia a lan thu a tarlang.
Hetih lai hian, Vairengte auto-rickshaw stand hluiah Mizo IR police-te an la duty ve reng bawk.