'Damna káwl êng' buatsaih

Mizoram Health Systems Strengthening Project (MHSSP) chuan nimin khan MRB Auditorium-ah inràwnkhawmna, 'Damna káwl êng' an buatsaih a; National Health Mission leh district-a Health depart-ment aiawh te, MHSSP thawhpui pawl aiawh te, Lai, Chakma leh Bru hnam aiawh te, Mizoram University aiawh leh World Bank team member-te an tel.

Inràwnkhawmnaah hian MHSSP hotute chuan, MHSSP thil tum zinga langsar zual chu vantlang hriselna lam enkawlna tur ruangám ṭha zawk siam te, a hun taka enkawlna pe thei tura inruahmanna te, health insurance scheme leh thawktu lam tihphuisuite a nih thu an sawi.

Mipui hnena natna inkai chhàwn theih loh chi (non-communicable disease) langsar zual chungchang zirtirna uar zawka kalpui te, NCD kaltlanga mipui hriselna ṭha zawk a awm theihna atana vantlang theihna hman ṭangkaite an ngaih pawimawh thu an sawi bawk.