KHAWTHLIR

Tumkau Ni

Naktuk Pathianni hi Tumkau Ni a ni a, Mizoram hmun hrang hrang bakah, Mizoram pawna Mizo awmte'n an lawm dawn. Tumkau Ni hi Isua ropui taka Jerusalem a luh hriatrengna atan hman ṭhin a ni a, naupangte'n Isua chawimawi nan tûmkau chawiin kawng an zawh dawn a, an au rual dawn bakah fakna hla an sa dawn a ni.

MP candidate pali

April 19, 2024-a Mizoram Lok Sabha MP tur thlanna neih turah political party pali-in an candidate tur an puang tawh. Candidate tur hi ZPM chuan puang hmasa berin, Richard Vanlalhmangaiha, Venghlui a ni a, PC party aṭangin Rita Malsawmi, Kolasib Venglai, Congress party aṭangin Lalbiakzama, Model Veng leh MNF aṭangin K Vanlalvena, Tuikhuahtlang te an ni.

Meizial man

Siaha District Anti Tobacco Squad, Siaha Police leh Legal Metrology department-te chuan March 21, Ningani khan Siaha khawpui chhungah dan loa meizial zawrh a awm leh awm loh an endik a, dawr pali aṭangin V báwmpui (carton) 76 leh Farstar báwmpui 150 an man.

PO-te zirtir

April 19, 2024-a Mizorama Lok Sabha inthlan awm tura Lunglei district-a polling officer (PO) turte tan nimin khan Saikuti Hall-ah thil pawimawh hrang hrang zirhona buatsaih a ni a, an mawhphurhna leh tih tur hrang hrangte hrilhfiah an ni.

Dan inzirtir

Champhai District Child Protection Unit (DCPU) chuan nimin khan Champhai Kahrawt YMA Hall-ah Sponsorship & Foster Care Fund an pek naupang 130 nu leh pa leh chhungte ko khawmin, naupang humhalhna dan leh hriat tur pawimawhte an zirtir. Fund hi naupang zirna hmasawnna atan te, damdawi lam mamawh phuhrûkna atan leh naupang ṭhan lennaa mamawh hrang hrang phuhrûkna atan hman tura pek a ni.