Covid-19: Mizoram dinhmun Hripui vei hmuh belh lo

October 4, Pathianni khan Mizoramah Covid-19 vei hmuh chhuah thar an awm lo. Nimin khan hripui vei zinga vei tawh lo mi 30 chhuahtir an ni thung.

Pathianni khan ZMC laboratory-ah leh district hospital hrang hrangah swab sample endik a ni lo a; Rapid Antigen Test hmangin district pali-ah sample 424 endik ni mah se, hripui vei an awm lo a ni.

Nimin khan mi 30 chhuahtir leh an ni a, Pathiannia chhuahtir zingah nimina Vanglaini chhuaka tarlan hman loh Assam Rifles mi 16 an awm bawk. Nimina chhuahtirte chu - SRH-ZMC aṭangin pathum, Tribal Art Centre CCC aṭangin 17, Serchhip CCC aṭangin pariat, Chhiahtlang leh Mamit CCC aṭangin pakhat ve ve an ni.

Mizorama Covid-19 vei hmuh chhuah tawh chu mi 2,120 an ni a, mipa 1,753 leh hmeichhia 367 an ni. An zinga mi 1,837 (86.65%) an chhuak tawh a, enkawl mek mi 283 (13.35%) an awm. La chhuak lo zingah hripui an vei tawh lo an awm nual bawk.