Mizoram Christian College hawng

Mizoram Synod-in secular college a din thar, Mizoram Christian College (MCC) chu nimin khan hawn a ni. He college-ah hian zirlai 228 an awm a, zirna an ṭan nghal.

MCC hawnna inkhawm hi Synod Office-a JM Lloyd Hall-ah hman a ni a, Synod executive secretary i/c MCC Rev. K Lalrin­mawia'n a kaihruai. MCC principal Rev. Dr Lalchungnunga'n college report a sawi bakah, assistant professor-te inhmelhriattirna hun a hmang a; MCC chu Synod moderator Rev. R Lalchangliana'n a hawng a, senior executive secretary Rev. Lianhmingthanga Sailo-in ṭawngṭaiin a hlàn thung.

Synod-in secular college a neih theih nan kum 1995 aṭangin rawtna a awm ṭan a, kum 2002 velah bawhzui ṭan ni mah se, kum 2010-ah tihtawp a ni. Kum 2017-ah rawt thar leh a ni a, kum 2018-ah bawhzui ṭan niin, academic session 2020-21 aṭanga zirna ṭan tura ruahman a ni.

MCC hmun nghet tur atan Tanhrilah sq.metre 39,891-a zau ram an nei tawh a, campus hmun nghet peih a nih hmaa class neihna atan Synod HSS hman rih a ni ang. MCC-ah hian department/subject pasarih - English, Mizo, Political Science, Sociology, Public Administration, Commerce leh Business Ad­ministration-te a awm.

Department tinah zirtirtu (assistant professor) pahnih ṭheuh an awm a, zirtirtute hian October 1 khan hna an zawm ṭan a, online hmangin class ṭan nghal an tum. Zirlai 228 an awm a, mipa 134 leh hmeichhia 94 an ni.