Synod-in ei leh bâra Mizoram A intodelhtheih nan hmalak rêl

Synod Inkhawmpui vawi 97-na rorel chu nimin khan chhunzawm a ni a; ei leh bâra Mizoram a intodelh theihna turin Synod anga hmalak leh, Synod Hospital-a leibá tihzângkhai nan dan zawh kim tinin Rs. 20 ṭheuh thawh an rél.

Synod Inkhawmpui hi moderator Rev. Dr C Lalhlira'n a kaihruai a; 'Ei leh bâra kan intodelh theihna turin Synod-in hma la rawh se,' tih chu an pawm. Sual thupha chawina, sual sim harhna a thlen theih nan leh chhiatna hrang hrang laka Mizoram a him theih nan ram pum huapa ṭawngṭai rual buatsaih an rél a; Mizoramah cancer natna a kiam theih nan ram pum huapa ṭawngṭai rual neih an rél bawk.

Synod Hospital-a leibá tihzângkhai nan dan zawh kim tinin Rs. 20 ṭheuh thawh an rél a; inrenchem tura inzirtirna Synod-in buatsaih thar leh turin an rél a, Synod Executive Committee bawhzui turin an dah.

Hetih lai hian, Covid-19 hripui léng vanga ṭàm thleng thei lakah ruahmanna siam rawtna chu hmalakna kal mek a nih thuin hrilhfiah a ni a; Mizo ṭawng humhalh nan KṬP General Conference leh Bial KṬP Conference hminga 'conference' tih chu 'inkhawmpui' tia thlak rawtna Presbytery pahnih aṭangin a lut a, 'conference' tih hman zui zel turin an ti thung.

Synod Inkhawmpui hi vawiinah a tàwp dawn a, chawhmaah pastor thar nemngheh leh probationary pastor tharte dahnghehna inkhawm neih a ni a; inkhawm hi cable TV-ah live pek chhuah a ni ang.