Kum 2021-22 budget ruahmanah project thar telh loh tur

Finance department chuan tun hnai khan budget controlling officer (BCO)-te hnenah kum 2020-21 budget revised estimate atan leh kum 2021-22 budget estimate atan ruahmanna (proposal) siam tura hriattirna a thawn a, project thar ti tel lo turin a hriattir nghal.

Vanglaini palai zawhna chhangin Finance dept. hotute chuan tun dinhmunah project thar tur thehluhin awmzia a la neih loh thu sawiin, "Administrative cost, project kal mek atana sum mamawh leh sum hmuh turte kan chhut phawt ang. Chumi hnuah project thar atan cheng engzat nge awm thei dawn a hriat chauh dawn a ni," an ti.

Finance department chuan, BCO-te chu an department ṭheuh atana kum 2020-21 revised estimate atan leh kum 2021-22 budget estimate atana ruahmanna an siamte chu November 13, 2020 aia tlai loah thehlut turin a hriattir a; a huna thehlut hman lote chu Finance department-in kum hmasaa budget estimate angin ruahmanna an siamsak dawn a ni.

•    Sorkar hnathawk nghet hlawh tur chu September, 2020 pay bill mila siam tur a ni.

•    MR-te hlawh tur chu anmahni zat aṭanga sorkarin an hlawh tura a bituk mila chhût tur.

•    Damdawia inenkawlna (medical treatment) tur chu mi pakhat tan Rs. 15,000 anga chhût tur.

•    Budget estimate chu sorkar sum dinhmun ngaihtuah chungin a tlem thei anga siam tur a ni a, sawifiahna chiang tak nen thehluh tur a ni.

•    Hna kal lai mek - state, CSS leh state budget chu scheme wise-in a tlem berah kum 3 expenditure framework nen thehluh tur.

•    Tun dinhmunah project thar kalpui tur chu a huam lo.