Airport chei ṭhat hna a hunah zo lo; zawh hun tur ṭum 3 pawtsei tawh

Lengpui Airtport chei ṭhat hna, Improvement/Upgradation of Operational/Non-operational facilities of Lengpui Airport thawh mekah contractor pakhat chu a thawh zawh hun tur ṭum thum pawhsei a ni tawh. Contractor dang pakhat pawhin a vawi hnihna atan a thawh zawh hun tur pawhsei a dil mek.

RTI Act tlawhchhana January 22, 2024-a zawhna, PWD department-in March 22, 2024-a an chhan danin, Lengpui Airport chei ṭhat hna thawh mek chu Renovation of Terminal building under Special Central Assistance (SCA) Fund tih leh Elevated Road with Connected Compounds of Terminal Building under NESIDS tihte a ni.

Terminal building thawm ṭhat hna thawktu contractor chu Zoramchhana, Electric Veng, Aizawl a ni a, Terminal building pawh tura kawng chhâwng (elevated road) siam hna thawktu contractor chu Kamlova Chhangte, Kamrul Lashkar tia hriat bawk, Ṭhuampui, Aizawl a ni thung.

SCA hnuaia terminal building thawm ṭhat hna chu March 10, 2021 aṭangin Zoramchhana'n a thawk ṭan a, September 10, 2022-a thawh zawh tura ruahman a ni. Kamlova Chhangte chuan elevated road tur chu September 30, 2021-ah a thawk ṭan a, March 30, 2023-a zawh tura ruahman a ni.

PWD Departmental Appellate Authority (DAA) tarlan danin, Zoramchhana hna chu zawh hun tura ruahmanah zawh hman a nih loh avangin March 8, 2023 leh October 21, 2023-ahte a thawh hun chhung tur pawhsei a ni tawh a, tunah hian May 6, 2024-ah zo hman turin pawhsei leh mek a ni bawk.

Kamlova Chhangte pawhin zawh hun tura bitukah a zawh hman loh avangin December 4, 2023 thleng a hna thawh hun chhung tur pawhsei a ni tawh a, tunah hian pawhsei dil leh mek.

Terminal building thawm ṭhatna atan SCA aṭangin Rs 21,24,07,000 (nuai 2,124.07) ruahman a ni a, hna thawh tur aṭangin 96.7% thawh zawh tawh niin, cheng nuai 1,254.05 hman a ni tawh. Kawng chhawng siamna atan NESIDS aṭangin Rs 19,58,99,822 (nuai 1,958.99) ruahman a ni a, hna thawh tur zinga 92.7% zawh tawh niin, cheng nuai 1,317.31 hman a ni tawh.

PWD DAA chuan zawhna chhángin, Lengpui Airport chei ṭhat hna atan hian restricted tender (RNIT No.1/CE-BLD/2020-2021 Dt:20.01.2021 leh RNIT No-1/CE-BLD/2021-2022 Dt:01.09.2021) hmangin tender chhuah a nih thu leh contractor pathum zinga a chháng hniam ber thlan a nih thu a tarlang.

Improvement/Upgradation of Operational/Non-operational facilities of Lengpui Airport hna thawhnaah a nihna ang tur ni loa thil siam, siam
ṭhattir leh a awm loh thu a tarlang bawk.

Chief minister Lalduhoma chuan January 6, 2024 khan Lengpui Airport a enfiah a; press conference a neih zuinaah, Kamrula ten Airport-ah ramp an siam mek thu sawiin, "Estimate-ah a ramp bang siamna tur a tel a, mahse, a bang siam loin an kalsan," a ti a, ramp bang chu siam leh nghal turin thu a pe tih a sawi.

Chief Minister sawi danin, Airport terminal páwna kawng chhâwng siam chu Kamrula (Kamlova Chhangte) siam a ni a, kawng chhawngin terminal a pawhna dopping zone pahnihah a chung zâr a ni lo a, estimate-ah a chung zàr tur a nih avangin a chung zar ve ve turin a hrilh. Estimate tel, a taka siam tel si loh dangte pawh estimate anga siam turin thu a pe bawk.