MLA aṭanga bàn a nih loh chhan tur sawifiah turin RM Chakma hriattir

Mizoram Legislative Assembly speaker Lalbiakzama chuan Tuichawng bialtu MLA Rasik Mohan Chakma chu MLA aṭanga bàn a nih loh chhan tur sawifiah turin March 23, 2024 khan a hriattir.

Assembly Speaker hian Chakma Autonomous District Council (CADC) MDC Doymoy Daveng Chakma hnen aṭangin complaint a dawn thu Rasik Mohan Chakma a hriattir a, "CADC Chief Executive Member ni chunga MLA i ni reng hi dan bawhchhiatna a nih thu a rawn thlen a, dan angin MLA aṭanga bàntir theih i ni," a ti.

Rasik Mohan Chakma hi The Mizoram State Legislature Members (Removal of Disqualification) (Amendment) Act, 2006 hmanga MLA aṭanga bàn a nih loh chhan tur April 15, 2024 hmaa sawifiah tura tih a ni.

Kum 2023 MLA inthlan khan Rasik Mohan Chakma hi CADC CEM a nih laiin MNF ticket-in Tuichawng bialah MLA atan thlan tlin a ni a, tunah hian CADC CEM leh MLA a ni kawp mek a ni.