CYMA leh Myanmar-a pawl hruaitute'n Mizorama ruihhlo donaah ṭanho an rêl

Central YMA leh Myanmar rama Zo hnahthlak pawl hrang hrang hruaitute chuan, Myanmar lama Chin unau páwl hrang hrangte nen Mizorama ruihhlo lut ṭhin a reh theihna tura theihtawpa ṭanho an rêl.

March 23, Inrinni khan CYMA Committee Room-ah Myanmar rama Zo hnahthlak pawl hrang hrang, Mizorama ráltlâna awm mek hruaitute an inkâwm a, CYMA president Lalhmachhuana'n kaihruaiin, Mizorama ruihhlo (heroin no. 4) tam lutuk chungchang leh a tihrêm dan tur leh Mizorama ráltlân awmte chungchang sawiho a ni.

Myanmar lama Chin unau páwl hrang hrangte nen Mizorama ruihhlo lut ṭhin a reh theihna tura theihtawpa ṭanho ni se, an ti a; páwl hrang hrang zingah ruihhloa inhnamhnawih an awm chuan tihtawp ni se, an ti. Chin state-a pawl ṭhenkhatte nen ruihhlo chungchang la sawiho leh an rel bawk.

Mizorama Myanmar ráltlân awmte chungchang sawiho a ni bawk a; ṭha taka ram leh khawtlang dan zâwm tur leh harsatna siam lo záwnga awm turin an inchah. Hemi chungchangah hian thuchhuah siam ni se, an ti.

Myanmar lama Zo hnahthlak pawl hrang hrangte inpumkhatna chungchang sawiho a ni a; inremna leh inpumkhatna a awm zel theih nan theihtawp chhuah turin CYMA hruaitute'n Myanmar rama Zo hnahthlak pawl hruaitute an ngen.

Inkawmhonaah hian Myanmar ráltlân pawl hrang hrang aiawh mi 42 leh CYMA hruaitu mi 30 vel an tel a ni.