Kan ram, hnam leh sakhua him nan a ṭul apiang tih ka inhuam - K Vena
April 19, 2024-a Lok Sabha inthlanpui awm tura MNF candidate K Vanlalvena chuan, Mizo ram, hnam leh sakhua himna turin a ṭul apiang tih a inhuam thu a sawi.
K Vanlalvena hian March 23, Inrinni khan Aizawl Press Club-ah thuthar thehdarhtute a kâwm a; "Pathian leh mipui zarah hnehna ka chang a nih chuan kan ram, kan hnam leh kan sakhua a him theihna atan Parliament House chhung leh páwnah a ṭul apiang ti turin ka inhuam tih Zoram mipuiin min hriatpui se ka duh," a ti.
Sum leh pai leh chhungkhat chhuan tur a nei lo nia sawiin Vanlalvena chuan, "Zoram mipuite'n kan ram tana kan thil tih tláwm tê tê min hriatsaka min khawngaih beiseiin Pathian kutah ka innghat," a ti a, MP inthlanah a chhinchhiahna arsi-ah ngei vote turin mipui a ngen.
K Vanlalvena chuan, Pathian leh MNF hotute zarah kum thum leh a chanve chuang Rajya Sabha MP a ni tawh tih sawiin, "Ka term kal lai mek hi July 2026-a tàwp tur a ni. Kan hnam leh kan sakhua vawng him tura Parliament chhung leh páwna au zel tura hun tam zawk ka neih theih nan candidate nihna hi lawm takin ka pawm," a ti.
Zawhna chhángin K Vanlalvena chuan, thlan tlin a nih chuan NDA lamah a ṭhut dawn thu a sawi a, "NDA hi UPA sorkar kal dan duh loh vanga party hrang hrang intêl khawm kan ni. Central-a an sorkar hma daih aṭanga tel tawh kan ni," tiin, NDA sorkarin India ram economy nasa taka an chawikan thu a sawi.
K Vanlalvena chuan, NDA an sorkar leh ngei dawna a lan thu sawiin, "Mizoramah hian tu pawh thlang tling ila NDA an sorkar ngei dawnin a hriat. Keini ang state pachhia chuan central sorkar kan nghen a ngaihna chin a awm. NDA sorkar hian hmarchhakah pawh hmasawnna nasa tak a thlen a ni," a ti.
BJP hruaitu zingah Hindu rama India siam tum an awma hriat a nih thu sawiin K Vanlalvena chuan, "Na takin kan dodal a, kan dodal zel a ṭul. Hnam leh sakhaw tênau zawkte tana ṭha lo tura chêt an tum chuan na takin kan dodal ṭhin a, a aia na zawka kan dodal zel pawh a la ṭul ang," a ti a; a ṭul phawt chuan Mizo ram, hnam leh sakhaw himna tur a nih chuan NDA chhuahsan an hreh loh tur thu a sawi bawk.
K VANLALVENA'N A HMALAKLNA A SAWITE
☑ Rajya Sabha MP ka nih chhungin Parliament session-ah vawi 15 ka au chhuak tawh a, zawhna eng emaw zat ka zawt tawh.
☑ Parliament session-a ka thusawiah leh Parliamentary Standing Committee on Commerce meeting-a ka thusawiah hlawhtlinna eng emaw zat hmuh tur a awm.
☑ Man man zawka sawhthing hralh a nih theih nan China aṭanga sawhthing lak luh titawp tura ka ngenna avangin sawhthing rate a sang ta niin a lang.
☑ Oil palm hralhna man tihsan a nih theihna tura ka ngennain hlawhtlinna hmel a hmu a, oil palm chíngtute minimum support price pek an ni.
☑ Parliament session-a thu ka sawi hmasak ber Mizorama Ayush Hospital cum Training Centre din tura ka ngennain rah ṭha a chhuah mek.
☑ Mizoram khawchhak tlangdunga lirnghing ṭhin ngaihsak tura ka ngenna te, vawk hri léng tuartute hnena zangnadawmna pe tura ka ngennate'n rah ṭha a chhuah.
☑ Myanmar aṭanga Mizorama rawn tlan lutte lo kuangkuah tura ka ngennate'n rah ṭha a chhuah.
☑ Manipur-a kan unaute thlavâng kan hauhnain central sorkar bengkhawn a hlawh hle.
☑ Bangladesh ramri hrúla khaw eng emaw zat motor kawngin a pawh theih nan Tlabung thlanga Khawthlangtuipui kânna lei dawh tura Home Ministry ka ngennain hlawhtlinna hmél hmuin, lei dawh nan cheng vbc. 54 sanction a ni tawh.
☑ Bairabi leh Mamit inkar kawngpui national highway tharah puan a ni.
☑ Zorinpui leh Longmasu inkar NH thar puang tura ka ngenna hlawhtlingin puan a ni tawh.
☑ Tuipui-D bula Chhimtuipui lui chunga permanent bridge siam tura kan ngenna leh Thingsai leh Pangkhua inkar kawngpui laih chawlhsan ringawt, chhunzawm tura hma ka laknate a thuphunga pawm a ni.
☑ KMMTTP siam mek hna muang lutuk tihchak nana Myanmar ram chhunga contractor awmte leh Arakan Army-te tlawha a hmun ngeia kala kan hmalaknate'n rah ṭha an chhuah mek.