Sum che vel vil uluk turin bank-te chah

Lok Sabha inthlanpui neih tura Mizoram tana expenditure observer Arvind Sharma chuan March 22, 2024 tlai khan Aizawl DC conference hall-ah Mizorama bank aiawhte a kâwm a, inthlan hun chhungin an bank ṭheuha sum che velte vil uluk turin a chah.

Arvind Sharma chuan, bank hotute chu inthlan chhungin candidate-te leh mipui bank account-a sum chêt vel danah rinhlelhawm (suspicious activity) awmte chu thuneitute hnena hriat­tir vek turin a chah a, "Inthlanpui thianghlim leh felfai nei turin bank thawktute in pawimawh a, Election Commission of India-in a beisei angin thil rinhlelhawmte ni tin report pe ṭhin ang che u," a ti a; cVIGIL application hmang ṭangkai turin a chah bawk.

SUM CHE VEL RINHLELHAWM

▶ Bank account aṭanga Rs 1,00,000 aia tam lâk chhuah emaw, dah luh (a hma thla hnih chhunga chutiang transaction la awm ngai lo).

▶ RTGS kaltlanga bank account pakhat aṭanga district/constituency khata mi tam tak account-a sum thawn chhuah (a hmaa chutiang ang sum inthawn chhuah la awm ngai lo).

▶ Candidate emaw, candidate affidavit-a tarlan an kawppui emaw, amaha innghat/chenpui (dependent)-te account-a Rs 1,00,000 aia tam thun luh leh lak chhuah.

▶ Inthlan hun chhunga political party account-a sum lut leh chhuak Rs 1,00,000 aia tam.

▶ Voter-te thamna ni thei àwm anga lang sum che vel (cash transaction) rinhlehawm dangte.