KHAWTHLIR

Thisen pe

March 23, Inrinni khan Mizoramah pawl pathumin thisen unit 154 an pe. KṬP, Dawrpui Bialin Civil Hospital, Aizawl tan thisen unit 79 pein, petute mipa 58 leh hmeichhia 21 an ni a; KṬP, Melthum Branch-in Synod Hospital Blood Bank-ah unit 17 an pe a, petute mipa 16 leh hmeichhia pakhat an ni. ṬKP, Bawngkawn Bial-in ZMC Blood Bank tan unit 58 an pe a, petute mipa 42 leh hmeichhia 16 an ni.

Chawlh puang

Lok Sabha inthlanpuiah a tam thei ang berin vote an thlak theih nan Governor Dr Hari Babu Kambhampati chuan vote thlak ní, April 19, 2024 chu sorkar hnuaia thawk ni lo (non-governmental employee), sumdawnna leh eizawnna danga thawk, Mizorama vote neite tan chawlhah a puang. Hna thawktute an chawlh avangin an hlawh paih ṭhensak phal a ni lo.

Helipad siam dawn

Ṭhuampui Helipad chu March 31, 2024 aṭanga April 5, 2024 thlengin thawm ṭhat a ni dawn a, hei vang hian thawm ṭhat chhungin helicopter a ṭum thei dawn lo tih sorkar thuchhuahin a tarlang.

Speaker intuaitharna

Mizoram Synod chuan a hnuaia revival speaker-te tan March 19-22, 2024 chhung khan Synod Conference Centre-ah intuaitharna a buatsaih a, Synod hnuaia revival speaker 70 (mipa 68 leh hmeichhia pahnih) an tel kim. Intuaitharna hi riah chilha buatsaih a ni a, a hawnna inkhawm chu Synod moderator Rev. R Vanlalnghaka leh senior executive secretary Rev. C. Zorammawia ten an hmanpui. Revival speaker-te chu an rawngbawl zelna tura pawimawh hrang hrang zirtir an ni.

World TB Day

Nimin khan World TB Day a ni a, Pathianni a nih avangin Mamit district-ah chuan March 23, Inrinni khan District Jail-ah hman a ni. District Jail-ah hian jail tángte pualin TB chungchang inzirtirna leh TB vei an awm leh awm loh enfiahna neih nghal a ni a, TB veia rinhlelhte chu TrueNat khawl hmangin endik an ni.