Lawngtlai MJA-in ṭanpuina an hlân

Mizoram Journalist’ Association (MJA), Lawngtlai District chuan May 23, Inrinni khan MJA din champha pualin Lairam Christian Medical Centre & Hospital-ah damlo retheite ṭanpuina atan Rs 5,000 an hlân a, khâwl thar an neihte an en bawk.

Ṭanpuina hlanna inkhawmah Lawngtlai district MJA president Elvis Lalthangzuala chuan, journalist-te chu engtik lai pawha bengchhi reng tur an nih thu sawiin, "Kan inthlahdah a thiang ve lo. Mipui tan rawngbawltu kan nihna hre reng a, theihtawp chhuah zel a ṭul. Sorkar leh mipui aṭanga thawhpuina ṭha tak kan dawng zel hi a lawmawm a, keini pawhin mipui rawngbawltu kan nihna kan hriat reng a ṭul," a ti.

Lawngtlai MJA President chuan, MJA thil tum (motto) chu ‘Service to the people’ (mipui rawngbawl) tih a nih thu sawiin, "Mipui tana rawngbawl tih thupuia nei kan nih ang takin kan phâk tâwk leh theih tâwkin mipui tan rawngbawlna hna kan thawk a, kan chhunzawm zel pawh a ngai," a ti a; Lawngtlai MJA leh LCMCH-in thawhhona thuthlung an ziah angin, damdawi-ina thawkte'n kawng hrang hrangin MJA-te duhsakna an tilang ṭhin chu lawmawm a tih thu a sawi.

LCMCH-ah hian thawktu 109 an awm mek a, tun hnai khan North Eastern Council aṭangin khawl thar, chi hrang hrang 16 an nei a ni.

MJA hi March 23, 1972 khan din a ni a, tunah hian kum 52 pumhlûm tawhin, Mizoramah member 190 vel an awm mek a ni.