Phullen khuaah lei a tlahniam Chhungkaw 3 an chhuak, kawng a ping
October 3, Inrinni zan khan Phullen khaw chhunga lei tlahniam ṭhin chu nasa takin a tlakhniam belh a; kawngpui a tlakhniam tel avangin lirthei kal tlang theih a ni lo a, in pathuma cheng chhungkuate an riah chhuah bakah, an bungruate an thiar chhuak tawh.
Phullen BDO Lalrinawma Khiangte-in Vanglaini palai zawhna chhánga a sawi danin, lei tlakhniamna lai hi tun hma pawhin nasa vak loin a tlahniam tawh ṭhin a, a nasat loh avangin an siam rem a, kawngpui pawh an hmang zui zel ṭhin. October 3 zana a tlahniam leh erawh chu a nasa ta a; lei tlahniam hi metre 80 vela zau a ni.
Lalrinawma Khiangte chuan, lei tlahniam awmna lai hnaia awmte chuan tun hmain an awmna lai chu an lo chhuahsan tawh tih sawiin, "Tun ṭumah hian a sir tawn tawna awm chhungkaw pathum an inthiar chhuak leh a. A dinhmun tak la hre thei lo mah ila, a chhak lama biak-in tan pawh a hlauhthawnawm thei dawnin a lang," a ti.
Lei tlahniam vanga inthiar chhuakte chu J Laltharmawia, Thianghlimi leh Lalchhungi te chhungkua an ni. Nimin lamah pawh nasa takin ruah a súr a, tlem tlemin lei a tawlh ṭhin niin thu dawnna pakhat chuan a sawi.
BDO sawi danin, Phullen BDO pisaa thawk zingah geologist pakhat a awm a, chumi ho chuan lei tlahniam lai chu an vil ṭhin. Hmalak zel dan tur ngaihtuahin October 4, Pathianni chhun khan BDO hoin VC leh YMA hruaitute an inhmu khawm a; a chhak lam aṭanga tui luan luhnate chu a theih ang angin a lak pênna siam nghal an rél.
Nimin khan Saitual DC VL Hruaizela Khiangte-in a tlawh a, bialtu MLA Lalrinliana Sailo-in a private secretary a tír bawk. Phullen BDO-in leilung lama mithiamte endiktir tura ngenna Disaster Management & Rehabilitation (DMR) department-ah a thlen tawh a, vawiin hian mithiamte'n uluk zawka an endik beisei a ni.
Lei tlahniamah hian Phullen khaw chhunga kawngpui pawimawh ber chu thawm ṭhat mai theih loh khawpa a chhiat avangin lirthei kal tlang theih a ni lo a, a chhaka kawngpui tê-ah chuan lirthei tê chi an kal thei thung. Kawngpui chhia hi Phullen leh a piah lam (hmar lam)-a khaw pangate châk lâkna ber a ni.