Mamit district-a hmasawnna ruhrel Pasarih dinna tur lung CM-in a phúm

Chief minister Zoramthanga chuan nimin khan Tuidam, Kawrthah leh Mamit khawpuia infiamna leh ṭhalaite hmasawnna ruhrel pasarih dinna tur lungphùm a phúm. Heng project-te Sports & Youth Services department kaltlanga Pradhan Mantri Jan Vikas Karyakram (PMJVK) hnuaia sum hmuh hmanga thawh tur a ni a, cheng vbc. 118 chuang sênna tur a ni.

Chief Minister chuan, ṭhalaite hmasawnna tur, an hma huna nasa taka remchànna siamsaktu tur thil thar ṭha tak tak bul ṭan a ni chu lawmawm a tih thu a sawi a, "A ṭangkai thei ang bera hman a nih ka beisei. Thawktute pawhin theihtawp chhuah se, ro tling thil, tualchhung mi mai ni lo, district pum tana chhenfâkawm tur a nih avangin ṭha taka a puitlin theih nan mipuite'n thawktute lo enpui se a duhawm hle," a ti.

Zoramthanga chuan, ṭhalaite chu zirna, infiamna leh kawng dang danga hma an sawn theihna tur zawnsak sorkarin a ngai pawimawh tih sawiin, "Tunlai khawvelah chuan remhria apiang tan eizawnna kawng ṭha tak tak a inhawng zel a, hâi chhuah tur a awm zel," a ti a; hlawhtling turin tawrhchhel leh taimâk a pawimawh thu a sawi.

Sports & Youth Services minister Robert Romawia Royte pawhin thu sawiin, Mizoram khawthlang lamah infiamna ruhrel ṭha a awm ṭha lo chungin infiamna hrang hrangah Mizoram leh India huapa lang pha tam tak an chhuah tawh thu a sawi a, "Vawiina hna ṭanna tur lungphùm phùm tâkte hi thawh zawh a nih chuan, Mizo hnam tana chhuanawm ṭha­lai tam tak an chhuah ka ring," a ti.

Lungphùm phùm inkhawm hi SYS secretary H Lalengmawia'n a kaihruai a; deputy chief whip Lalrintluanga Sailo leh Mamit bialtu MLA H Lalzirliana te pawh an tel a ni.