Jackie-a thih chhui dan duhkhawp lo Uluk zawka chhui turin thuneitute ngen

September 28, 2020-a mi kut tawrh vanga thi N Jackie, Damveng, Aizawl thih dan police-te'n an chhui dan chu an duhkhawp loh thu, basketball a khelhpui ṭhin Mizo Ballers Association leh a ṭhiante'n an sawi.

Mizo Ballers Association (MBA) leh N Jackie-a ṭhiante hian nimin khan thuthar thehdarhtute an kâwm a; MBA convener Darliansanga chuan, September 23, 2020 khan Jackie-a chu MS Chenkual Picnic Spot-a birthday party-ah a kal ve thu sawiin, "F Lalremsanga, Bethlehem Veng leh Samuel Lalchhuanmawia, Mission Vengthlanga mite insual a ṭhelhna lamah Jackie-a hi F Lalremsanga'n vawi khat lek hneka a tluk avanga nikhaw hre loa awm ta anga sawi a ni," a ti.

Jackie-a bawihsâwmtute sawi danin, motor-a an kuah luh dawnah thiin a luak nasa tih sawiin Darliansanga chuan, "Hliam a tawrh nasat êm avangin Civil Hospital-ah hruai a ni a, ODP card-a a lan dan chuan, a lú-ah vúng a awm a, a hnárah thi a chhuak a ni. X-Ray aṭanga a lan danin, a lu ruh a chhîp thlengin a khi ngei tih hmuh theih a ni a, Civil Hospital-a thawk ṭhenkhat chuan a hnár a kawih vek thu an sawi," a ti a; a hliam chu vawi khat hnek tluk vang nia an rin theih loh thu an sawi.

Darliansanga sawi danin, Jackie-a hi September 24, 2020 khan Ebenezer Hospital-ah hruai a ni a, investigation tih nghal a ni. Damdawi-ina thawkte'n Jackie-a chhungte an hrilh danin, a lu ruh a khì mai a ni lo a, a thluakah hmun tam takah thî a tling a, a chal leh bekah hliam tawrhna duk a awm a, a thluak a vùn nasat bakah, a thluak hma lam leh bek lehlam lehlamah thisen zám chat tam tak a awm. Jackie-a hi September 28 zing dar 3:35-ah a hliam tuar loin a thi a ni.

MBA hruaitute chuan, investigation ti hmasatu Kulikawn Police Station-te'n Jackie-a'n kut a tawrh zana party-naa kal zingah F Lalremsanga chiah thu zawhfiah a nih thu sawiin, "Jackie-a'n sawisak a tawrh zana kal zingah F Lalremsanga tih loh chu police custody-ah thu zawhfiah vanga hrên an awm lo. F Lalremsanga pawh October 15, 2020 khan bail phalsak a ni. Kan ṭhiana thihna chhui kawnga kan thil hriatte aṭangin police-te phuartu an awm niin kan ring," an ti.

Jackie-a thubuai chu West Phaileng PS-ah sawn a nih thu sawiin MBA hruaitute chuan, "Case IO kan dawr fo a, a thawhpuite hmalak tawhna tihdanglam theih loh anga min chháng hi mak kan ti hle. Jackie-a ṭhiante hi kan rilru a dam thei lo. Tuna investigation kal ang chuan pawi khawihtute hian an phû tâwk hremna an hmu dawn loin kan hria. A tìr aṭangin tun aia uluk zawka min chhui ṭhatsak leh turin thuneitute kan ngenin kan phût a ni," an ti.

Mizo Ballers Association hruaitute sawi danin, Jackie-a sawisak a nih zana picnic spot-a awm vete chu bail an nih tawh avangin thu zawhfiah tura koh theih an nih tawh loh thu police-te'n an sawi a; police-te'n bail tawh anga an sawite chu bail an ni lo tih court-ah an finfiah thung a ni.