Nikum aiin buh thar tam beisei
Agriculture minister C Lalrinsanga chuan, Mizoramah nikum aiin kuminah buh thar a tam zawk an beisei thu a sawi a, "Mizorama thar buhfaite chu sorkarin lei dan a ngaihtuah zel dawn," a ti.
Vanglaini palai zawhna chhángin Agriculture Minister chuan, "Tun dinhmunah engzat chiah nge thar a nih dawn hriat theih a la ni lo a, ṭhenkhatin an seng ṭan chauh a ni. Nikum ai chuan kan thar tam ngei ang," a ti a, department lamin a hriatpui loh leh inhriattir kher lote pawh kuminah buh chíng thar eng emaw zat an awm thu a sawi.
C Lalrinsanga chuan, Covid-19 avangin mi tam takin an chuktuah huan leh an cheibàwl tawh lo huanahte buh an tuh thu sawiin, "Chung mite chuan an buh thar zat department lamah an rawn report a nih loh chuan keini tan zawn chhuah a, an thar zat hriat vek a harsa. Chuvangin, Mizorama buh thar zat tak chu hriat a harsa ang," a ti.
Nikum aia buh thar a tam zawk chhan tur sawiin Minister chuan, "Buh chíng ngai loin Covid-19 vangin an chìn bakah, leilet lamah pawh ṭan kan la nasa. Hmun tam takah leilet siam belh a ni a, department chuan kháwl hmangin mi tam tak lei a lehsak a ni," a ti a; Covid-19 vanga lei lettu tur hmu zo lote pawh department-in a theih ang angin a ṭanpui thu a sawi.
Agriculture Minister chuan, Mizorama buh thar, hralhna tur hre lote sorkarin leisak a inhuam thu sawiin, "Supply department nena ṭangkawpin leisak vek kan tum. Food Corporation of India aṭanga leina aia to deuha lei a nih pawhin Mizoram chhungah vek pawisa a che vel dawn a, a ṭha tho mai thei tihte ngaihtuahnaah a awm," a ti.
C Lalrinsanga chuan, Mizorama buh thar chhuah state danga a chhuak nasa lutuk chu veiawm an tih thu sawiin, "Hei hi a chhan ber chu leilet neitute'n hnam dang an enkawltir a, anni'n an state-ah an hralh leh ṭhin a ni. Hei hi a reh theihna atan hma kan la dawn," a ti a; leilet neitute'n hnam dang enkawltir loa Mizo ṭhalai an enkawltir theih nan ruahmanna siam an tum thu a sawi.
Mizoramah farmer interest group (FPO) din a nih dawn thu sawiin Agriculture Minister chuan, "FPO hi engzat chiah nge kan din theih dawn kan hre lo. FPO-ah hian mi 100 tal an tel a ngai a, soft loan (3% a pung) cheng vbc. 2 vel thleng an la thei. Tunah hian FPO atan cheng vbc. 198 kan nei sa. State Level Monitoring Commmittee-te vilna hnuaiah FPO hi kut hnathawktute'n an chhawr ṭangkai thei dawn a ni," a ti.