Lok Sabha inthlan lo awm turah candidate paruk an awm dawn?

April 19, 2024-a Lok Sabha MP inthlan lo awm turah hriat theih chinah candidate paruk an awm dawn a, nimin thleng khan nomination thehlut pakhat chiah a la awm thung.

Political party pangate chuan an candidate tur an puang tawh a, anni candidate bakah hian independent-in pakhat a ding dawn nia hriat a ni.

State-a rorellai ZPM chuan candidate an puang hma ber a, March 11, 2024 khan an pisa-ah an candidate tur chu Richard Vanlalhmangaiha, Venghlui, Aizawl a nih thu an puang.

PC Party chuan an candidate tur Kolasib Press Club-ah March 18 khan an puang. An candidate tur chu Rita Malsawmi, Kolasib Venglai niin, ani chiah hi hmeichhe candidate tur a awm rih a ni.

Mizoram Pradesh Congress Committee chuan March 21 khan Congress Bhavan-ah an candidate tur chu Lalbiakzama, MPS (Rtd.), Model Veng, Aizawl a nih thu an puang.

MNF president Zoramthanga chuan March 22 khan an party pisa-ah an candidate atan Rajya Sabha MP ni lai K Vanlalvena, Legislator Home, Tuikhuahtlanga cheng mek ruat a nih thu a puang.

Mizoram BJP chuan nimin khan an pisa-ah an candidate tur an puang a, an candidate tur hi an president ni lai Vanlalhmuaka, Ṭhuampui, Aizawl a ni.

Hetihlai hian Lalhriatrenga Chhangte, Kulikawn chuan independent-a chuh a tum thu a sawi. Lalhriatrenga hi Lok Sabha MP inthlan hnuhnung ber pawh khan independent thoin a ding.

Nimin thleng khan returning officer Nazuk Kumar, Aizawl DEO hnenah Richard Vanlalhmangaiha, ZPM chiahin nomination a la thehlut a; nomination thehluh hun hi March 27 thleng hawn a ni.