Mi 67-in harsatna an tawh phahna bekangah natna hrik hmuh a ni

Tun hnaia Khumtung khaw mi 67 in bekang an ei avanga harsatna an tawh chhan chu Health department hnuaia Food & Drugs Administration lamin an zirchiang a, bekang umah hian khawsikpui thlen theitu natna hrik ‘Salmonella Typhi’ hmuh chhuah a ni.

Khumtungah hian Food & Drugs Adminis-tration-a mithiamte kalin, an bekang ei sample an la a, Selesiha College of Veterinary Science and Animal Husbandry laboratory-ah endik a ni. Endiknaah hian Salmonella Typhi an hmu chhuak.

Mithiamte chuan Salmonella Typhi hi khawsikpui thlen theitu hrik a nih thu sawiin, "Tui emaw, ei tur tihbawlhhlawh leh thianghlim tâwk loah a darh thei. Mihringin a ei hnuah lo puangin thisen kalkawngah a ṭaidarh ta ṭhin a ni," an ti.

March 9, 2024 khan Khumtunga kohhran pakhat hmeichhiate chuan sum tuakna atan bekang an zuar a, he bekang eitu mi 67 chuan harsatna an tâwk. Mi 45-te chu an nat zual deuh avangin Aizawla damdawi-in hrang hrangah enkawl an ni.

Civil Hospital Aizawl-a enkawl kum khat leh thla kaw mi Lalthansangi chu March 15 zan khan a thi a; naute nu hian bekang hi a eive a, nausen hian a nu hnute hnekna aṭangin natna hrik hi a kai a nih rin a ni.

Hetihlai hian bekang an ei avanga damdawi-in hrang hranga enkawlte chuan dam takin damdawi-in an chhuahsan tawh hlawm.