NABARD sum hmanga sikul chei leh sak ṭhat Lokayukta-in chhui turin ACB a hriattir

NABARD sum hmanga sikul chei ṭhat leh sak ṭhat chungchang complaint an dawn bawhzui nan Lokayukta chuan chhui chiang turin Anti Corruption Bureau (ACB) a hriattir.

Lokayukta chuan NABARD sum hmanga sikul chei leh sak ṭhat chungchangah hian February 25, 2022 khan complaint an dawng a, Education Director hnenah ṭum thum leh Finance Secretary hnenah hriatfiah duh an neihte an zawh hnuah preliminary enquiry neih turin thutlukna an siam.

ACB-te chu preliminary inquiry ti turin June 24, 2022 khan hriattir an ni a, ACB chuan December 19, 2023 khan Lokayukta-ah preliminary equiry report an thehlut.

Lokayukta chuan February 6, 2024 khan hearing koin, February 13, 2024 khan he thubuai hi chhuizui turin thutlukna a siam.

Mizoram Pradesh Youth Congress Committee (MPYCC) chuan, NABARD sum hmanga sikul sak ṭhat leh chei ṭhatnaah eirûkna a awm nia ngaiin February 25, 2022 khan chhui chiang tura ngenna Lokayukta-ah hian an thehlut a ni.

MPYCC chuan, Education department-in Mizorama sikul 172 chei ṭhatna atan NABARD-ah cheng nuai 3,500 a pûk thu tarlangin, “Pawisa pûk hi Mizoram hmun hrang hrangah dik lo taka hmanna leh sum tihchingpenna nasa tak a awm ngei nia kan hriat avangin chhui chhuah ngei kan duh,” an ti.

MPCC Vigilance Cell-in NABARD loan hmanga sikul thawm ṭhat 15 an zir chian tawh thu tarlangin MPYCC chuan, "Sikul 15 an zirchianna aṭang ringawt pawhin sum hman dan dik lo tam tak a awm ni ngeia a lan avangin Mizoram puma sikul 172, NABARD loan hmanga thawm ṭhatte chu chhui chian kan duh a ni," an ti a, sum hman dik lohnaa mawhphurtu chhui chhuak turin Lokayukta an ngen a ni.