Mizoram BJP candidate atan Vanlalhmuaka ruat

Kumina Lok Sabha inthlana Mizoram BJP party candidate atan Vanlalhmuaka, MBJP president ni lai ruat a ni. Vanlalhmuaka chuan, "Central-ah minister kan nei thei a, Mizoram hian Pu Modi-a buhzêm bula ṭhu tur kan mamawh," a ti.

Nimin khan MBJP office conference hall-ah Lok Sabha MP candidate tur puanna inkhawm neih a ni a, MBJP president hlui Lalramtiama'n an candidate tur chu Vanlalhmuaka a nih thu a puang.

Vanlalhmuaka chuan, politics-a Mizo mipui sûkthlêk thlak a hun tawh thu a sawi a, "Kan rilru sûkthlêk kan thlak loh chuan central-ah kan hlawhchham zel ang tih ka hlau. Kan ṭhenawm state-te chuan central sorkar nen thawh duna, an state tan theihtawp chhuah a, central aṭanga púr châwka, an state mipuite mamawh thlen kha an tum avangin tun MP inthlan lo awm turah hian an insiamrem vek, " a ti a, tun MP inthlan lo awm turah hian thlan tlin a nih chuan Mizoramin central-ah minister a neih theih thu a sawi.

Party dang MP candidate-te an ṭhat vek thu sawiin Vanlalhmuaka chuan, "MP inthlanpuiah hian India ram pumah Pu Modi-a kaihhruai sorkar an chak leh ngei dawn a, Mizorama party dang MP candidate-te hi thlan tlin lo ni ta se, Delhi-ah khuan an tlatlum dawn lo. Thawhchhuah nei lo leh leiba ngah state kan ni a, chuvangin Mizoram hian Pu Modi-a buhzêm bula ṭhu tur kan mamawh," a ti.Ramri buai avanga Mizoram ṭhenawm state-te'n national highway an dan chah pawh khan central-a BJP hotute khak ngai khawpa hma a lak thu sawiin, "BJP State President i nih kha i hre lo a mi an rawn ti, Mizoram BJP President ka nih avang zawkin Mizoram leh Mizo mipuite tawrhna tur economic blockade hi a awm ka remtih loh thuin ka chhang," a ti a; Mizoram mipui leh sorkarin an chhawr theih, central-a ruling MP ni thei tur thlang turin Mizo mipuite a sawm nghal.

Vanlalhmuaka, Ṭhuampui Veng, Aizawl hi December 12, 1972-ah a piang a; thiamna lamah graduate niin, kum 2020 aṭanga vawiin thlengin Mizoram BJP president a ni.

VANLALHMUAKA THUSAWI DANGTE

☑ Mizoramin BJP MP kan neih chuan he Zoram mamawh, Pu Modi-a buhzêma awmte hawn thei tu tur kan nei tihna a ni.

☑ Kan ṭhenawm state-te hmasawnna kan lehthal theih nan tuna MP inthlanpui hi Mizo mipuite'n hmang ṭangkai ang u.

☑ Central sorkar do thei ni lo, thawhpui thei tu kan mamawh a, chu chu keini MBJP-te hi kan ni.

☑ Central sorkar ka do ngam tih hian awmzia a nei lo a, chuvangin thawhpui dan thiam a ṭul.

☑ Mizoram mipui leh sorkarin an chhawr theih tur central-a ruling MP thlang turin Mizo mipuite ka sawm a ni.

☑ Central-a Pu Modi-a bula ṭhu tur central minister nei turin tun hi Mizote tan kan chance ṭha a ni.