MP ka nih zui zel hi kan ramin a mamawh nia hriatna ka nei - K Vanlalvena

Lok Sabha MP inthlan lo awm tura MNF candidate K Vanlalvena chuan nimin khan Kolasib Press Club-ah thuthar thehdarhtute kawmin, MP a nihzui zel chu Mizoramin a mamawh nia hriatna a neih thu a sawi.

K Vanlalvena chuan party pakhat candidate nimah se, Parliament House-ah Zoram mipuite tan, Zoram pawna Zofate tante party sawi loin nasa takin a lo au tawh tih sawiin, "Chuvang chuan mipui candi­date, Zofate candidate ka inti. Rajya Sabha term kal mek, kum 6 awmah tunah hian kum 2 leh thla 4 vel hun ka la nei a, Rajya Sabha chu MLA vote niin inthlan leh hunah rorel lai ZPM-in min thlan a rinawm tawh lo," a ti.

India ram, Mizoram leh a chhehvel politics thlirin ram leh hnam tan MP a nih zui hi Mizoramin a mamawh nia hriatna amahah a awm thu sawiin K Vanlalvena chuan, "Kan ram leh hnam, kan sakhua humhim turin MP ka nih zui hi kan ramin a mamawh," a ti a, Mizoram UT a nih tirh aṭanga tun thlengin Lok Sabha leh Rajya Sabha MP ni tawhte thusawi zawng zawng belh­khawm aiin Mizoram tan thu a sawi tam tawh zawk thu a sawi.

K Vanlalvena chuan Rajya Sabha chu upper house tih ni zawk mah se, lower house Lok Sabha chu sorkar dintu zawk a nih vangin rawngbawlna chance a tam zawk tih sawiin, "Ka term zawh hunah pawh kan ram leh hnam hian chhan ala ngai dawn chauh. Parliament chhungah thâwm tihnat ala ngai dawn," a ti.

MNF chu NDA dintute zinga mi a nih thu sawiin K Vanlalvena chuan, NDA lama an thawhpuiten Zofate tana thilpawi tur an tih chuan an huat huamin hmalak a ngai leh mai thei tih a sawi a, "Min duhsaktu tam takin NDA chhuahsana neutral-a awm turin min ngen ṭhin a, min duhsak lo tute pawhin min beih nan an hmang," a ti a, NDA lama ṭhu chungin Mizote dinhmun hum­him turin a au theih thu a sawi.

Covid-19 vangin kum 2 chhung MP fund an nei lo tih Rajya Sabha MP chuan sawiin, "Tunah hian kum khat leh a chanve vel MP fund nei ve tawh ang kan ni a, a hre duh chuan RTI hmangin zawt sela, an hre thei vek. Kan bial a zau a, kan sem tam a, sawisèn a ni lo," a ti.

K Vanlalvena hi MNF sr.vice president Dr R Lalthangliana, MNF adviser K Lalrinliana leh hruaitu dangte'n an ṭawiawm.