BJP hi an hlauhawm takzet - AAP, Mizoram

Aam Aadmi Party (AAP), Mizoram chuan thuchhuah siamin, sorkar laipuia BJP sorkarin dik lo taka chhan mumal awm loa an hruaitu, AAP National convener leh Delhi chief minister ni lai Arvind Kejriwal an man nia tarlangin, "BJP hi an hlauhawm takzet a, Mizoramah BJP ṭan tâwk leh BJP zawmpui NDA zawm an la awmzel hi thil mak a ni," an ti.

AAP Mizoram chuan Arvind Kejriwal chu sorkar laipuia Enforcement Directorate (ED) chuan March 21, Ningani zan khan an man tih an sawi a, "BJP-in dawta an puh avangin PMLA Act hnuaiah man a ni. Delhi Excise Policy chungchanga thamna laa puh niin, amah Kejriwal-a chuan he policy-ah hian amah leh an party hotute chauh target an ni chu mak a tih thu a sawi," an ti.

Kejriwal-a Lawyer chuan he case chungchanga vawi 200 chuang Kejriwal-a in an dap hnuah pawh an puhnaah hian finfiahna engmah an hmuh loh thu a sawi tih tarlangin AAP Mizoram chuan, "Delhi Excise Policy-ah hian Delhi Lt. Governor leh official dangte pawhin an hming an sign ve vek tih Arvind Kejriwal-a'n a sawi a, midang chunga thubuai engmah siam si loa amah leh an party hruaitute chauh thubuai siam sak an ni hi a dik loh thu leh thamna engmah AAP hian a lak loh thu a sawi," an ti a; Kejriwal bakah hruaitu dangte dik lo taka a hrenbehna aṭanga chhuah zalen thuai turin BJP sorkar an phût thu an tarlang.

AAP Mizoram tarlante

◉ Lok Sabha inthlan a hnaih tawh avangin hetiang hian BJP sorkar hi a che niin mi tam tak chuan an ngai.

◉ Shashi Tharoor chuan, 'He thil hi pawm theih a ni lo a, Supreme Court hi Suo Moto hmanga inrawlh turin ka ngen a ni,' a ti hial.

◉ India Democracy thuthlung chu a chhungrilah BJP sorkarin beiin, an thuneihna hmang sualin kawng dik loah hruai a tum mek.

◉ Arvind Kejriwal-a hi chief minister nilai man hmasak ber a ni a, kum 2 chhung ED-in chhui mah se chhan mumal awm loin an man.

◉ BJP hian an tana hnawktura an rinte dah bo zel an tum ni berin a lang.

◉ Indian Constitution hnuaia sakhua leh mimal zalenna hi thiam takin BJP hian nuai bo hret hret an tum.

◉ BJP hmalak meknaah hian Mizoram mipuite pawh thudik hria a, theihtawp chhuaha BJP sorkar do turin kan sawm a ni.