Covid-19 vaccine pek dan tur ngaihtuah

Champhai District Task Force for Immunization chu nimin khan an chairman Maria CT Zuali, bawrhsap hoin DC conference hall-ah an ṭhu a; Covid-19 laka invenna damdawi (vaccine) pek dan tur an ngaihtuah.

Maria CT Zuali chuan, Covid-19 donaa a hmatáwnga awm (frontline worker)-te hnenah vaccine pek hmasak tur a nih avangin, pek hmasak turte list a rang lama database siama thehluh a ngaih thu a sawi a, "Covid-19 dona kawnga rál hmatáwnga dingte fâwm kim thei ang bera database siam tur a ni," a ti.

Champhai chief medical officer Dr R Lianmawia chuan, Champhai district (district ṭhen hma angin) chhunga health care worker 1,269-te database siama thehluh a nih tawh thu sawiin, "Vaccine nihphungte leh dawn zat turte hriat mai theih la ni rih lo mah se, vaccine dawn huna hmalak dan turte thlirin thawktute pawh training pek thuai tum a ni," a ti a; thawktu leh hmanraw neih sa hmanga vaccine pek buaipui theih an inbeisei thu a sawi.

Database thehluh tawha tel health care worker 1,269 zinga 1,231 chu sorkar hnuaia thawk an ni a, mi 38 chu private hospital-a thawk an ni. Inpuahchahna atan tun dinhmunah Champhai CMO huam chhungah Vaccine Facilities Centre 18  leh Vaccine Session Site 67 ruahman a ni.