MP inthlan tur atan inbuatsaih

Lunglei district election officer Ramdinliani, district bawrhsap ni bawk hoin nimin khan DC conference hall-ah April 19, 2024-a Lok Sabha inthlanpui lo awm tura sector officer atana ruat mi 36-te leh polling station thuamṭhatna tura mawhphurtu nodal officer-te thil pawimawh hrang hrang a sawipui.

Ṭhutkhawmah hian sector officer-te'n an bial ṭheuha polling station dinhmunte leh assured minimum facilities (AMF) - electric, tui, mipa leh hmeichhe inthiarna, approach road, ramps, etc. te a awm em tih endikna an tarlang a; an report aṭang chuan road communication planning leh road map-te duan fel nghal a ni.

Road Communication nodal officer H Zonunmawia, Tlabung SDO (Civil) chuan polling party-te'n despatch centre aṭanga polling station an panna tur kawng hnai ber road map bakah, sector officer-te'n an bial chhunga awlsam leh hneh lehzuala dan leh thupek kenkawh theihna tur leh, vote thlak ni-a an sector hnuaia EVM chhia a lo awm palh pawha rang taka polling station-te an vil zung zung theih nan an kawng zawh tur road map a duante a tarlang a; siamṭhat ngai laite siamṭhat a ni.

Kum 2023 MLA inthlanpuiah khan Lunglei district chu sector 28-ah ṭhen niin, sector pakhat hi sector officer pakhat leh sector police officer pakhat zelin an vil a; kumin Lok Sabha inthlanpuiah erawh sector officer-te'n hneh lehzuala dan leh thupek an kenkawh theih nan leh vote thlak ni-a EVM chhe palh a lo awma polling station-te an vil zung zung theih nan sector 36 siam a ni.