MZU-a kal ṭhinte an inhmukhawm

Mizoram University Alumni Association (MIZUAA) chuan tunhnai khan MZU Education Department Conference Hall-ah General Body Meeting vawi 3-na an nei a; MZU zirlai lo ni tawh, tun sorkara minister pathum - Dr Vanlalthlana, B Lalchhanzova leh Prof. Lalnilawma te an chawimawi.

Ṭhutkhawm hi MIZUAA president Emanuel Lalhriatzuala Ralte-in a kaihruai a; minister B Lalchhanzova leh minister of state Prof. Lalnilawma te'n thu an sawi. Dr Vanlalthlana erawh rokhawlhna avangin a tel thei lo thung a ni.

B Lalchhanzova chuan rethei leh hausa inkar zau chu a vei thu a sawi a, "Ka office-a lo leng lutte ka lo dawnsawn danah hausa leh rethei ka lo thliar hrang palh em tiin ka inenfiah ṭhin. MZU alumni association hi university tana pawl pawimawh tak a ni a, alumni-te hi university tan mai ni lo, Mizoram tana ṭangkaina nei zel tur leh hlawk taka thawk turin ka cha duh cheu a ni," a ti a, MIZUAA-ten an alumni an chawimawi chu amah an chawimawina a ni mai lo a, anmahni an in chawimawi tel tih a sawi.

Prof. Lalnilawma chuan university changtlung zawkah an alumni-te'n contribution an ngah ṭhin thu a sawi a, "Keini university pawh hi alumni-te'n ngaihlu ang u. Ram siamṭha turin ṭhalaite politics-a ke kan pen a ngai a, ram siamṭha tak tak tur chuan politics a pawimawh hle, " a ti a; alumni-te chu ram siamṭhat puiah sawmin, politics aṭanga ram siamṭhat a awlsam ber avangin politics-ah luta, a fawng vuantu a ṭan a ṭul thu a sawi.

MIZUAA General Body Meeting-ah hian office bearers atan - Emanuel Lalhriatzuala Ralte, Dr R Zonunsanga, Lalremruata Hmar, Dr Lalmuanzuali, Dr Henry Zodinliana Pachuau, Lalruatpuia, Lalbiakzuala leh Lalremsangi-te thlan an ni.