KHAWTHLIR

MJA khawmpui

Mizoram Journalist Association (MJA) chuan vawiin chawhma dar 11 aṭang hian Lianchhiari Rûn, DIPR-ah general conference vawi 50-na an hmang dawn a, IPR addl. secretary Betsy Zothanpari Sailo-in a hmanpui ang. MJA khawmpuiah hian chawhnu lamah rorel a nih dawn bakah, kum 2024-2026 chhunga hruaitu tur thlan a ni ang.

Dan zirtir

Kolasib District Legal Services Authority (DLSA) chuan March 24, Pathianni chawhnu khan Thingdawl Venglai Presbyterian Kohhran Hall-ah Narcotic Drugs & Psychotropic Substances Act (NDPS Act) (Search and Seizure and Punishment) zirhona an buatsaih a, Kolasib Fast Tract Court judge R Vanlalena leh chief judicial magistrate Cacy Malsawmtluangi Ralte-te'n thu an sawi. NDPS Act zirhonaah hian Thingdawl Venglai Branch KṬP member 56 an tel.

Awmpui lo turin ngen

MSU Sub. Hqrs., Lungsen chuan thuchhuah siamin, Chakma zirlai naupang awmpui nei lo turin an khawtlang mipuite an ngen a, zirlaite chu zirnaah hma an sawn zel theihna atan theihtawp chhuah turin an chah.

Ruihhlo vangin mi 11 thi tawh

Excise & Narcotics department chhin-chhiah danin, ruihhlo avangin kumin (March 8 thleng) chhungin ruihhlo vangin mi 11 in nunna an chan tawh. Ruihhlo avanga nunna chante hi mipa 10 leh hmeichhia pakhat an ni a; mi paruk chu heroin avanga thi niin, mi panga chu heroin leh ruihhlo dang tih pawlh vanga thi an ni.

Zanriah kilpui

Aizawl West-III bialtu MLA VL Zaithanzama chuan March 23, Inrinni zan khan a chenna inah British Army-a lut tur (assessment nei tur) Mizo tlangval mi parukte zanriah a kilpui a, duhsakna a hlan. He hunah hian Mizoram Youth Commission chairman Malsawmzuala Ralte pawh a tel.