MPESS tharte'n Governor leh CM an kâwm
Governor PS Sreedharan Pillai leh chief minister Zoramthanga chuan nimin Mizoram Planning, Economics & Statistical Services (MPESS)-a tling thar mi parukte a kâwm a, Economics & Statistics director Dr Lalrinchhana leh official dangte'n an ṭawiawm.
Raj Bhavan-a MPESS-te nen an inkhawmnaah PS Sreedharan Pillai chuan, India hmarchhak tihhmasawnna atan sorkar laipuiin budget aṭanga 10% a dah thu sawiin, chu chu hmarchhak biala cheng, India ram mipui aṭanga 3.76% velte tan tam tham tak a nih thu a sawi a, "Sum awm tam dan hi project siamtute'n an hriat chian a ngai a, central aṭanga sum hâi luh kawngah tun aia nasa zawka ṭan a ngai a ni," a ti.
Governor chuan, sorkar hna ringawt lo deuh ngaihven a ṭul thu leh Mizoram leilung chu thlai chi tin ṭhat duhna a nih thu sawiin, "Ei leh bârah kan intodelh pumhlûm thei rih lo a nih pawhin, kan mamawh zualpuite hi chu kan thawk chhuak thei tih a chiang. Kan state chhunga kut hnathawh kan hreh laia state páwnah kut hnathawka eizawng kan nih leh si chuan insiamṭhat a ngai a ni," a ti a; ei leh bâra intodelh turin thinlung lamah inpuahchah hmasak a ngaih thu a sawi.
A pisa-a an inkawmnaah Chief Minister chuan MPESS tharte chu a lawmpui thu hrilhin, "Sorkar inrelbawlnaah planning a pawimawh hle. Thil awm lo aṭanga dinchhuah ngaih chang a awm ṭhin. Mipui leh ram mamawh ni si, sorkar aṭanga ruahmanna awm si loh avanga din chawp a ṭul ṭhin a ni," a ti a, MPESS tharte chu Zoram tana mi ṭangkai tak an nih theih nan an hmabakah theihtawp chhuah turin a chah.
MPESS tharte pual hi nimin khan orientation programme neihpui ṭan a ni a, Planning conference hall-ah a hawnna inkhawm hman a ni. October 15, 2020 thleng awh tur orientation programme hawnna hun hi principal adviser Lalrikhuma Sailo-in a kaihruai a; Planning secretary Dr C Vanlalramsanga, additional secretary Lalramsanga Sailo leh Director ten thu an sawi.
MPESS lak tharna atan hian kumin tìr lamah written exam neih a ni a, lockdown vangin hun eng emaw chen personal interview neih theih a nih loh hnuah September thla khan nei a ni. MPESS tharte hian nimin vêk khan chief minister Zoramthanga an hmu bawk.
MPESS lâk tharte
1. Zoremmuana Ralte
2. R Lalfakzuala
3. Vanlalkhumtiri Chhangte
4. B Lalchhandama
5. Lalhmangaihsangi Ralte
6. H Lalengzauva